Misioni ambicioz ruso-evropian ExoMars, i cili planifikohet të dërgojë robotë në Planetin e Kuq, është shtyrë në vitin 2022 për shkak të problemeve teknike, por dhe të epidemisë së koronavirusit në botë, njoftoi agjensia ruse e hapësirës.
“Roskosmos dhe Agjensia Evropiane e Hapësirës kanë vendosur të vonojnë nisjen e misionit të dytë ExoMars për vitin 2022, i cili synon të eksplorojë Planetin e Kuq”, tha agjensia ruse.
Sipas një plani të mëparshëm, qëllimi ishte që të ulet roveri Rosalind Franklin në vendin Oxia Planum në fund të shkurtit 2021 dhe më pas të fillohet të kërkojë shenja jete në Mars.
Ky është misioni i dytë ExoMars që kërkon shenja jete në një thellësi prej dy metrash nga sipërfaqja e Marsit.
Ai përbëhet nga një platformë ruse sipërfaqësore dhe një rover evropian, të cilat duheshin lëshuar duke përdorur raketën ruse Proton nga kozmodromi Baikonur.
Nisja ishte planifikuar për në korrik, por inxhinierët ranë dakord që automjeti robot nuk ishte teknikisht i mjaftueshëm për të përfunduar me sukses misionin. /tesheshi.com/
