Ministri i Jashtëm Ditmir Bushati e ka quajtur arritje e jo dështim, shtyrjen e hapjes së negociatave pas një viti. Edhe për faktin se në vendimin europian për shtyerje me një vit, krahas Shqipërisë është dhe Maqedonia, kryediplomati Bushati është treguar i qetë kur ka sjellë dhe një tjetër precedent të ngjashëm.
“Është përcaktuar një afat kohor, qershori i vitit 2019 për fillimin e bisedimeve për anëtarësim. Edhe në rastin e Serbisë dhe Malit të Zi është përcaktuar një afat kohor”, deklaroi Bushati në një konferencë për shtyp. Për të, ky zhvillim është gjithsesi pozitiv.
“Kursi i reformave që ka ndërmarrë Shqipëria nga momenti që mori statusin e vendit kandidat është impresionues, por që duhet të thellohet edhe më tej në muajt në vijim”, tha kreu i diplomacisë së Tiranës. /tesheshi.com/
