Seanca e Kuvendit të Kosovës e paraparë të mbahet ditën e nesërme është shtyrë për një ditë tjetër. Ky vendim i ka mundësuar edhe njëherë LDK-së së Isa Mustafës që të shpalosë pakënaqësitë duke kërkuar zgjedhje të reja.
Shefi i grupit parlamentar të kësaj partie, Avdullah Hoti, ka thënë se Kuvendi është bërë jofunksional.
“Seanca e nesërme e Kuvendit shtyhet. Kuvendi është bërë jo funksional. Kuvendit i ka humbur kuptimi, si institucioni me i larte i shtetit. Është urgjente funksionalizimi i institucioneve legjitime, përmes zgjedhjeve të lira e demokratike”, shkruan Hoti në Facebook.
Arsyet pse është shtyrë seanca seanca nuk janë bërë të ditura.
Kujtojmë se LDK ka kohë që ka paralajmëruar një mocion mosbesimi ndaj qeverisë “Haradinaj” por deri më tani nuk kanë marrë asnjë iniciativë për mbledhjen e nënshkrimeve.
Kjo parti e para organizoi një tryezë me partitë dhe më pas PDK por që nuk arritën kurrfarë kompromisi. Tryezë të tillë këtë të premte organizon edhe Vetëvendosje me kërkesën për mbajtjen e zgjedhjeve të reja parlamentare. /tesheshi.com/
