Nuk do të luhet të shtunën, siç qe parashikuar, finalja e Kupës së Greqisë, e cila ka vënë përballë dy skuadrat e Athinës, Olimpiakosin e Pireut dhe AEK-un.
Pikëpyetjet mbi sigurinë gjatë ndeshjes i kanë detyruar autoritetet e ruajtjes së rendit të kërkojnë pezullimin e ndeshjes. Trazirat e mundshme dhe rreziku i penalizimeve nga FIFA kanë bërë që qeveria greke të marrë vendimin për anulimin e finales.
Zëvendësministri për sportet, Stavros Kontonis, e ka lajmëruar sot vendimin, duke theksuar se finalja do të shtyhet për më së paku dhjetë ditë.
Ndeshja është planifikuar të luhet në stadiumin olimpik, teksa tifozëve u është ndaluar pjesëmarrja në terrenin sportiv.
Vendimit të sotëm i ka paraprirë incidenti në gjysmëfinalen e parë të kupës, në Selanik, ku takimi mes PAOK-ut dhe Olimpiakosit u ndërpre për shkak të hyrjes së tifozëve në fushë dhe ngjarjeve që pasuan. Federata greke e futbollit e pezulloi tërë aktivitetin e kupës, por më pas u detyrua të lëshonte pe për shkak të sanksioneve. PAOK-u nuk u paraqit në takimin e dytë, kështu që Olimpiakosi fitoi të drejtën për të luajtur në finale.
Futbolli grek është goditur herë pas here në vitet e fundit nga ngjarje të tilla, që kanë çuar në pezullimin e ndeshjeve, madje dhe të kampionatit. /tesheshi.com/
