Nga Mensur Krasniqi
Pas shumë pritjeve dhe stërzgjatjeve mbasadori amerikan në Maqedoni, Jess Baily, në një deklaratë të përbashkët me përfaqësuesit e BE-së, mbrëmë vonë para godinës së qeverisë ka deklaruar se vlerësimi i tyre është që nuk janë përmbushur kushtet për të organizuar zgjedhje të besueshme, të lira dhe demokratike më 24 prill.
Ai ka vlerësuar se ende nuk janë miratuar reformat konform Marrëveshjes së Përzhinos, ku si elemente kyçe mbeten pastrimi i listave zgjedhore dhe reformat në sferën e medias.
Siç tha Bailey, data mbetet që të përcaktohet nga partitë politike, por ai rekomandoi që zgjedhjet të caktohen sa më shpejtë që është e mundur, sapo të përfundojnë reformat.
Ky qëndrim i ndërkombëtarëve si duket ka qenë një goditje e fortë për partitë politike në pushtet, VMRO-BDI, të cilët fuqishëm shpresonin në 24 prillin si datë më e volitshme për zgjedhjet, sepse kështu nuk do kishte pasur kohë të mjaftueshme për pastrim të listave zgjedhore, dhe ata do ripërsëritnin metodën e manipulimeve me votat fiktive.
Për dallim prej partive në pushtet, opozita shqiptare po edhe ajo maqedonase, njëzëri kanë përshëndetur vlerësimin e komunitetit ndërkombëtar si të saktë dhe të dobishëm. Sipas tyre kjo është një garancë që zgjedhjet e ardhshme duhet të jenë të lira dhe demokratike duke përfshirë këtu pastrimin definitiv të listave zgjedhore dhe rregullimin e çështjes së mediave. /tesheshi.com/
