Merr një kthesë të fortë afera e ndërhyrjes ruse në mediat shqiptare. Dy ditë më parë, në mediat shqiptare u publikua një shkrim i Mark Gjonajt, një politikani shqiptaro-amerikan në Asamblenë e Nju Jorkut, ku theksohej se Moska ka blerë 1 televizion dhe 3 portale shqiptare.
Ky shkrim ka shkaktuar reagimin e fortë të ambasadës ruse në Tiranë.
Shkrimi, ku citohej Gjonaj theksonte se “shtimi i numrit të atasheve kulturorë, atasheve tregtarë, pranë përfaqësive diplomatike ruse në Tiranë, Podgoricë, Shkup, Beograd dhe Prishtinë ka si qëllim krijimin e kushteve për hapjen e një qendre të njëjtë homologe të Nishit të Serbisë, por tani me seli në Tiranë”.
Pas shkrimit të Gjonajt reagoi ashpër ambasada e Rusisë në Tiranë, që e cilëson gjithçka si paranojë të tij. Sipas përfaqësisë diplomatike të Moskës në kryeqytetin shqiptar, kultura ruse pritet me mjaft entuziazëm në Tiranë.
“Meqenëse z. Gjoni jeton në SHBA, do t’i rekomandonim që ndonjëherë të vinte në Tiranë dhe të vizitonte ndonjë event kulturor të organizuar nga Ambasada për të parë me sytë e tij se me çfarë entuziazmi e pret artin rus publiku shqiptar”, thuhet në deklaratën e ambasadës ruse që është publikuar në faqen e Facebook-ut.
Por vetë Mark Gjonaj, në një reagim nga Nju Jorku, deklaroi se gjithçka është një trillim dhe nuk ishte ai autori i shkrimit ku citohet. 
“Po ju shkruaj në lidhje me një artikull të botuar ditëve të fundit në portale të ndryshme: ‘Rusia ka blerë një televizion në Shqipëri dhe tre portale, së shpejti edhe një gazetë’ me 14 Qershor, 2017 ku identifikohem si Asambleist i Shtetit të Nju Jorkut.
Dua të bëj të ditur publikisht dhe kategorikisht se as une dhe as dikush në emrin tim, nga zyra ime e Asamblese apo e Fushatës, nuk ka shkruar një artikull të tille, nuk ka dhënë intervistë dhe as ka komentuar në lidhje me këtë çështje.
Si rrjedhojë, kërkoj që menjëherë ky artikull i fabrikuar të hiqet nga faqja juaj në internet dhe të ndalohet shpërndarja dhe botimi i këtyre lajmeve të fabrikuara dhe të rreme dhe gjithashtu kërkoj që të botoni një përgënjeshtrim të këtyre deklaratave.
Sinqerisht, Mark Gjonaj Asambleist i Shtetit të Nju Jorkut”.
Po atëherë kush e ka shkruar shkrimin në mediat shqiptare?!
Drejtuesi i portalit që e ka publikuar i pari shkrimin i tha tesheshi.com se artikulli është shkruar nga Mark Gjonaj, por ky i fundit siç duket është tërhequr meqë përbën një informacion të klasifikuar.
Që do të thotë se politikani shqiptaro-amerikan i shtetit të Neë York-ut, duket se ka folur si shumë dhe tani po e mohon.
Siç mësohet materiali në fjalë ka alarmuar qarqet e shërbimit sekret amerikan dhe ato të NATO-s, që nuk kanë pritur që të publikohen negociatat për blerjen e medias shqiptare nga rusët.
Bëhet fjalë për një media shumë të rëndësishme në Shqipëri, e cila ka televizion, radio, gazeta, portale dhe revista. Është një grup i madh mediatik që siç mësohet ka nisur tratativat me persona të njohur, që kanë ardhur nga Serbia.
Siç mësohet, tratativat kanë nisur pikërisht kur menaxhimin e këtyre mediave e kanë marrë njerëz të rëndësishëm politikë në vend, të lidhur me një politikan me shumë peshë. /tesheshi.com/
