Gjithnjë e më tepër po shtohen zërat që protestojnë ndaj menaxhimit të krizës së refugjatëve nga vendet e Bashkimit Europian. Europa, duket se papritur ka braktisur vlerat e solidaritetit dhe përkushtimin ndaj të drejtave të njeriut që qëndrojnë në thelb të ekzistencës së BE-së dhe po menaxhon në mënyrë kaotike krizën e paprecedent të refugjatëve që kanë mësyrë territorin e saj për shkak të luftërave e diskriminimit në vendet e origjinës.
“Ballafaqimi me rritjen e fluksit të refugjatëve, azilkërkuesve dhe emigrantëve nga vendet fqinjë të Evropës do të kthehet në një sprovë vendimtare për BE-në, nëse nuk ndodh diçka së shpejti”, shkruan në një artikull Deutsche Welle.
Artikulli vijon me konstatimin se qëndrimi dinjitoz ndaj refugjatëve nuk është i garantuar jo vetëm në Greqi e Hungari, por edhe në Gjermani.
“Strehimoret e mbipopulluara, banda grabitëse trafikantësh, agjitacion ksenofobik, kampe të egra në stacionet e trenit, tek kanali i Kalesë apo në mes të Brukselit. E gjithë kjo është një realitet i hidhur dhe nuk ka të bëjë me Evropën e solidaritetit dhe të drejtësisë”, vijon artikulli.
Madje, edhe kancelarja Angela Merkel nuk duket se ka ndonjë plan. “Kështu nuk mund të vazhdohet. Gjermania, Austria dhe vende të tjera që strehojnë shumicën e azilkërkuesve, po bëjnë thirrje për një zëvendësim të rregullave të Dublinit dhe një shpërndarje të “drejtë” e azilkërkuesve në të gjitha 28 shtetet anëtare të BE-së. Shumica e shteteve, megjithatë, nuk është prekur nga kriza aktuale dhe për këtë arsye nuk ka asnjë interes për ndryshimin e rregullave apo edhe një kuotë pranimi. Për sa kohë që të gjithë azilkërkuesit duan të shkojnë në Gjermani, Suedi ose në Austri, çdo gjë është në rregull, mendojnë polakët, spanjollët, irlandezët, finlandezët dhe shumë të tjerë. Solidaritet? Asnjë shenjë”, thuhet në artikull.
Një nga pasojat e para të krizës mund të jetë konfliktimi i shteteve europiane, që mund të sjellë kufizimin e lirisë së udhëtimit në të ashtuquajturën “zonë Shengen” dhe rivendosjen e kontrolleve të rregullta kufitare. /tesheshi.com/
