Donald Trump, kandidati zyrtar i republikanëve në garën presidenciale në SHBA, nuk është në hall vetëm me kundërshtarët demokratë. Janë njerëz me emër nga krahu i tij politik që po i vihen kundër njëri pas tjetrit.
E tillë ishte dhe një deklaratë e pesëdhjetë zyrtarëve republikanë të sigurisë kombëtare te New York Times, e cila vinte në pah padëshirën e qartë të tyre për ta parë Trump-in si presidentin e ardhshëm amerikan.
Këta zyrtarë amerikanë të sigurisë kombëtare kanë punuar për vite për presidentë të ndryshëm, nga Niksoni e gjer te Xhorxh W. Bushi, me një njohje të thellë të problematikave njerëzore.
“Ne jemi të bindur se ai do të jetë një president i rrezikshëm dhe do ta vërë në rrezik mirëqenien dhe sigurinë kombëtare të vendit tonë,” thuhet në deklaratën e përbashkët.
Kundërshtia e ekspertëve të sigurisë ndaj kandidaturës republikane është e dukshme në fjalët, “asnjë nga ne nuk do të votojë për Donald Trump-in”.
Mungesa e karakterit, e vlerave, e përvojës për të qenë president, si dhe padituria alarmuese për faktet bazë, sipas përpiluesve të deklaratës, janë arsyet pse ai nuk duhet të jetë president.
Veç të tjerash, ata kanë vënë në dukje pamaturinë e Trump-it, rrëmbimin, si cilësi jo të vyera për detyrën e presidentit.
“Ai nuk është në gjendje apo nuk është i gatshëm ta ndajë të vërtetën nga gënjeshtra,” është shkruar mes rreshtave në deklaratën e ekspertëve republikanë të sigurisë. /tesheshi.com/
