Mensur Krasniqi
Në mënyrë që të bashkohet opozita shqiptare pa ndonjë kauzë politike, por në mbrojtje të kauzës kombëtare dhe shembjen e Bashkimit Demokratik për Integrim, Lëvizja Besa kishte inicuar Këshillin Mbipartiak. Ky Këshill sipas tyre është i hapur për të gjitha partitë opozitare në përjashtim të PDSH-së së Menduh Thaqit dhe BDI-së, që sipas Besës vlerësohen si “e keqja e popullit shqiptar”. Në këtë Këshillë tani më janë bashkangjitur shumë organizata joqeveritare, analistë politik, intelektualë, profesorë universitar, hoxhallarë, afarist të ndryshëm etj.
Së fundi nëpërmjet një postimi në profilin e tij në rrjetin social Facebook, profesori universitar Ali Pajaziti ka shprehur mbështetjen për Këshillin Mbipartiak. Mes tjerash, profesori Pajaziti thekson se këtë vendim e merr si pasojë e menaxhimit destruktiv të deritanishëm dhe politikbërjes pa objektive konkrete.
Njoftimi i pr.dr Ali Pajazitit për mbështetjen e Këshillit Mbipartiak:
“I nxitur nga sedra intelektuale, nga ndërgjegja qytetare, i deprimuar nga ajo që ndodh ditëve të fundit në hapësirën time jetike (Saraj), nga politikbëria pa objektiv të bazuar në ideal konkret-autentik dhe sterile, nga partizimi që e ka lënë popullin jetim, nga menaxhimi destruktiv i demosit shqiptar, i trazuar nga shpresëthyerja gjurmëlënëse e shkatuar nga lidershipi që po fundos anijen e ardhmërisë së të rinjve tanë, me shpresën se nismat e reja tejpartiake do të sjellin një qasje tjetërfare kauzës sonë të përbashkët, mobilizim në bazë të parametrave aksiologjikë (vlerorë), shpreh mbështetjen time për “Këshillin mbipartiak”.
Përvec Pajazitit, gjatë ditës së sotme në të njëjtën formë, nëpërmjet rrjetit social Facebook haptas ka informuar opinionin mbi përkrahjen e Këshillit Mbipartiak, edhe hoxha nga Dibra, Xhemail Çupi.
“Me plotë bindje dhe vendosshmëri, pa frikë dhe ndroje dhe me shpresë se iniciativat e këtilla të politikbërrjes me personalitete intelektuale përtej-partiake të kenë sukses në zgjidhjen e këtij ngërci politik dhe në këtë periudhë të brishtë politike, ekonomike dhe sociale, ku ka humbur besimi popullor te “politikberesit” aktual, përkahi denjësisht iniciativën e “Këshillit mbipartiak“, shkroi hoxhë Xhemail Çupi.
/tesheshi.com/
