Prej ditësh, për shkak të rritjes së shit-blerjeve në prag të fundvitit, në të gjitha hipermarketet e Kosovës, po kryesisht ato në Mitrovicë, pronarët iu kanë zgjatuar orarin e punës punëtorëve nga 8 orë sa është e paraparë në ligj në 12 orë, pa asnjë pagesë shtesë.
“Ai që kundërshton këtë orar të zgjatur të punës prej 12 orëve shkon në shtëpi”, ky është urdhri i pronarëve të hipermarketeve, ka thënë punëtorë të tyre në Mitrovicë si ETC-ja, Emona City, Viva fresh etj.
“Jemi skllevër a çfarë jemi?”, këtu nuk munda ta deshifroj”, ka thënë një nga ata me kusht të anonimitetit.
“Ndryshimi i vetëm që ne punëtorët e hipermarketeve kemi nga skllavi, është se ne marrim një pagë minimale 180-220 euro në muaj, ndërsa që për asgjë tjetër nuk ndryshojmë nga skllevërit”, ka shtuar ai bukur i brengosur.
“Skllav jemi për arsye se pronari dikton çdo gjë, orarin e punës, ndëshkimin, dëbimin nga puna, mosdhënien e pushimit vjetor, zgjatjen e orarit të punës, mos pagesën e kontributeve etj”, ka thënë dikush tjetër si ai.
“Kosova ka një ligj të punës që specifikon se orari i punës është 8 orë në ditë, por ky ligj nuk respektohet nga pronarët, pasi që ata i kanë korruptuar inspektorët nga Ministria e Punës dhe Mirëqenies Sociale”, ka shtuar një tjetër.
“Punëtorët e hipermarketeve me shumicë punojnë pa kontrata të punës, pa iu paguar kontributet dhe me orar të zgjatuar nga 12 orë në ditë ,sidomos kur janë festat në pyetje, por si kundërshpërblim për këtë orar të zgjatuar nuk përfitojnë asnjë cent”, sqarojnë ata.
Sipas tyre, inspektorët e punës vijnë nga një herë, bisedojnë me pronarin dhe dalin nga aty duke mos pyetur fare asnjë punëtor se çfarë punë bënë, sa orë punon, çfarë page merr, a iu paguhen kontributet etj.
“Ne punëtorët jemi të detyruar që për shkak të asaj page, të ulim kokën dhe të durojmë tortura të ndryshme nga pronarët pasi që me atë pagë minimale mbajmë familjen, po na vërejti pronari se ne po bisedojmë me inspektor, menjëherë pason përjashtimi nga puna”, shprehen ata, duke shtuar se për çdo gabim të vogël, menjëherë pason dënimi nga pronari me 10 përqind të pagës dhe kjo ndodh nëse dikush vjedhje ndonjë gjë në hipermarket, punëtori përgjegjës për atë sektor menjëherë dënohet me 10 përqind të pagës edhe për këtë ne duhet të durojmë pasi që çdo veprim tjetër i punëtorit në mbrojtjen e të drejtës së tij të punës pason me largim nga puna”.
Në anën tjetër, zyrtarë të Inspektoratit të Punës i kanë thënë portalit tesheshi.com me kusht të anonimitetit se pronarët e këtyre hipermarketeve janë aq të fuqishëm sa nuk kemi mundësi të bëjmë më shumë për shkak se kanë mbrojtje direkt nga zyrtarë e lartë të qeverisë së Kosovës apo ndonjë deputet të fuqishëm në Kosovë duke mos dashur të përmend ndonjë emër.
“Pajtohem me thënien e punëtorëve se më të vërtetë, punëtorët në hipermarkete por edhe në kompanitë e ndërtimit, nuk trajtohen ndryshe vetëm si skllevër”, ka thënë zyrtari nga Inspektorati i Punës. /tesheshi.com/
