Presidenti francez njoftoi sot për zgjatjen e gjendjes së jashtëzakonshme me tre muaj të tjerë, si një masë e menjëhershme pas ngjarjes tragjike të Nicës. Shtete të tjera europiane në të njëjtën kohë nuk kanë qëndruar duarkryq, duke i forcuar masat e sigurisë.
Kryeministri beg foli për masa të duhura shtesë që do të merren në kuadër të Ditës Kombëtare javën e ardhshme.
“Tashmë kemi ndërmarrë një numër hapash në lidhje me përgatitjet për 21 korrikun, dhe shërbimet tona të sigurisë po i vlerësojnë vazhdimisht masat që janë të nevojshme,” shpjegoi Charles Michel në një intervistë radiofonike.
“Nuk ka dyshim se shërbimet tona të sigurisë po e përfshijnë në analizat e tyre informacionin që rezulton nga ky akt i kryer natën e shkuar në Nicë.”
Ai bëri me dije se autoritetet e vendit të tij po e merrnin në konsideratë mundësinë e përdorimit të një mjeti për sulm në një turmë të madhe.
Shefja e qeverisë britanike, e sapozgjedhur në atë post, pohoi për rishikimin e situatës së sigurisë në vend.
“Niveli i kërcënimit në Mbretërinë e Bashkuar është tashmë i lartë, që do të thotë se një sulm terrorist është shumë i mundshëm,” qartësoi Theresa May. “Zyrtarë të lartë po shohin sot se çfarë mund të bëjmë më tepër për të vlerësuar nëse duhet të ndërmarrim veprime të mëtejshme, por policia dhe shërbimet tona të sigurisë janë gjithmonë vigjilente.”
Qeveria italiane lajmëroi për rivendosje të kontrolleve në kufirin me Francën. Ajo u kërkoi zyrtarëve lokalë t’i rishohin masat e sigurisë pas ngjarjes së Nicës.
Ministri i Brendshëm në detyrë i Spanjës, Jorge Fernandez Diaz, tha këtë të premte se do të shtohen masat e sigurisë në zonat me aktivitet të lartë turistik, si dhe në veprimtari ku priten grumbullime të mëdha njerëzish.
Gjermania po ashtu bëri të ditur shtimin e kontrolleve në aeroporte, në rrugë dhe në kalimet hekurudhore me Francën.
Të njëjtin veprim ndërmori dhe Çekia, duke shtuar kontrollet në aeroportin e kryeqytetit të vendit, e duke i forcuar masat e sigurisë në aeroportet e tjera ndërkombëtare, në stacionet e trenave, e aty ku zhvillohen aktivitete artistike e sportive. /tesheshi.com/
