Ka shkuar në 5 numri i të shëruarve nga koronavirusi në Shqipëri, por numri i të infektuarve kaloi 100, ndërkohë që hartës i është shtuar dhe Vlora e Shkodra.
“Vetëm në 24 orët e fundit janë konfirmuar 15 raste të reja pozitive, në 45 testime të kryera. Harta e të prekurve nga COVID-19 shtrihet tashmë edhe në Vlorë, Shkodër dhe zgjerohet në Tiranë, Durrës, përveç rasteve të zbuluar për të cilat po kryhet hetimi epidemiologjik, si Lushnja, Kavaja, Fieri, Rrogozhina ku po punohet pa u ndalur nga epidemiologët për gjurmimin e kontakteve të rasteve pozitive dhe ndërprerjen e transmetimit të infeksionit.
Kemi dhe një lajm të mirë në këto ditë të ngarkuara, sot kanë lënë shërbimin infektiv dhe 2 pacientë të tjerë, duke e çuar në 5 numrin e të shëruarve”, tha ministrja Manastirliu.
Ndërkaq, kryeministri Rama tha se rritja e kurbës është e pritshme këtë javë. “Kjo javë do të jetë tejet e vështirë sepse sipas modeleve statistikore tani hyjmë në fazën e shpërthimit më intensiv të atyre bombave në trupin e njerëzve të prekur”, tha Rama.
“Kush e ka menduar se kjo luftë do të kalojë pa humbje jete e ka menduar gabim. Kush nuk e ka marrë vesh akoma që virusi do të prekë shumicën prej nesh, si kudo në botë, çfarëdo të bëjmë ne, nuk ka qenë i vëmendshëm. Gjithçka bëjmë ne ka shumë rëndësi, duke u disiplinuar maksimalisht e ngadalësojmë përhapjen e armikut dhe kështu ulim humbjet e jetëve.
Forca dhe durim! Ne duhet të dalim nga kjo luftë me kokën lart jo duke numëruar qindra e mijëra të vdekur, larg qoftë e duke transportuar kufoma me makina ushtarake për t’i gjetur një copë varr nëpër kodra larg vendmbanimit.
As Zoti vet nuk na ndihmon dot po nuk ndihmuam veten dhe po nuk ndihmuam njëri-tjetrin”, theksoi kryeministri. /tesheshi.com/
