Agjencia turke e lajmeve Anadolu Ajansı njofton se autoritetet përkatëse të Koresë së Jugut po i nxisin restorantet lokale të shërbejnë ushqim hallall duke vënë në punë një sistem të ri certifikimi.
Restorantet do të certifikohen në bazë të pesë niveleve, nga ato që i përmbushin plotësisht kërkesat e Federatës Muslimane të Koresë te ato që nuk kanë mish derri në listën e ushqimeve të tyre.
Në një udhërrëfyes turistik që do të dalë në qarkullim gushtin e këtij viti do të ketë të reklamuara 200 restorante hallall. Këtë e ka bërë të ditur për agjencinë turke një zyrtar i Organizatës Koreane të Turizmit.
E njëjta organizatë njofton se Korenë e Jugut e vizituan vitin e shkuar 740.000 muslimanë, me pjesën më të madhe të tyre nga Malajzia dhe Indonezia.
Ndërsa numri i vizitorëve muslimanë pritet të shkojë në 800.000 këtë vit, është parë e nevojshme nga autoritetet vendase të inkurajohet shtimi i restoranteve që shërbejnë ushqim hallall. /tesheshi.com/
