Sërish shteti guxoi të shkonte për ngushëllim aty ku po qahet një viktimë e dobësisë së vet. Jo nga qeveria por nga rendi, në shtëpinë e Avdiajve në Laprakë, mbërriti për të pirë kafen e hidhur të mortit, pas jetëhumbjes së një 7-vjeçareje prej një efektivi policor, kreu i Policisë Shqiptare Gledis Nano.
“Nuk dua të keqinterpretohet ardhja ime këtu. Kam ardhur si prind e si qytetar dhe falënderoj familjen Avdia e cila i mirëpriti ngushëllimet e mia dhe përveç përgjegjësive se çfarë ka ndodhur, i mirëkuptoj dhe i falënderoj që ngjyrime të caktuara i kanë lënë mënjanë dhe janë duke vuajtur të gjithë atë se çfarë ndodhi”, tha Nano.
Kujtojmë se e mitura Jonada Avdia humbi jetën në plazhin e Potamit në Himarë, teksa ishte duke u larë me babain e saj, pasi e kapën helikat e një gomoneje që drejtohej nga komisari Arjan Tase.
Ky i fundit rezulton një efektiv me probleme, pasi si ish-shef i Komisariatit të Himarës është dyshuar dhe për implikim në çështje kanabisi. Por kishte mundur t’i shmangej drejtësisë, duke u rikthyer në Policinë e Shtetit, kësah here si Komandant Policimi në Komunitet në Drejtorinë e Elbasanit. Është pikërisht kjo që ka irrituar opinionin, duke e identifikuar rastin e tij me vetë qeverinë, edhe nga fakti se posedimi dhe ngarja e gomones nga një efektiv policie ishte tërësisht në shkelje të ligjit. /tesheshi.com/
