Nga Blendi Gashi
Situata e sigurisë në Kosovë çdo ditë e më shumë po merr përmasa shqetësuese me mundësi të destabilizimit të vendit. Këtë e tregon më së miri fakti se nuk kalon thuajse një ditë e vetme që nuk raportohet për djegie të veturave të institucioneve shtetërore në mbarë vendin.
Vetëm gjatë mbrëmjes së mërkurës u dogjën pesë automjete të institucioneve shtetërore të blera me paratë e taksapaguesve kosovarë: në Gjilan, Ferizaj, Mitrovicë e Pejë dhe Malishevë.
Përkundër se piromanët janë vënë në aksion në çdo komunë të Kosovës, Policia dhe Prokuroria e Shtetit kanë dështuar deri më tash të zbardhin rastet e zjarrëvënies ndaj makinave zyrtare.
Krejt çfarë ka bërë deri më tani policia është deklarimi se ka arrestuar një person të dyshuar për djegien e veturës së zv.ministrit Bajram Gecaj, por në anën tjetër ka dështuar të kap personat që dogjën veturën e gjyqtarit Hamdi Ibrahimi, ministrit Memli Krasniqi, shefit të PDK-së Adem Grabovci, shefit të LDK-së Ismet Beqiri.
Poashtu, ende s’e kanë zbuluar autorët të dëmtimit të zyrave të Presidencës e as ata që gjuajtën me molotov shtëpinë e Kryeministrit.
Përderisa, Policia dhe Prokuroria janë në një ‘gjumë’ të thellë, një grup i ashtuquajtur ‘Qytetarët e pakënaqur’ po merr përsipër djegien e veturave, duke paralajmëruar se do të vazhdojnë me aksione të tilla derisa Qeveria e Kosovës nuk heq dorë nga ‘Zajednica’.
Policia: Alket Zeqiri dogji veturën e gruas së zv.ministrit Gecaj – VV: Ky është montim kriminal e fashist
I vetmi rast që Policia e Kosovës pretendon se ka kapur një nga autorët e djegies së veturave është arrestimi i aktivistit të Vetëvendosje-s Alket Zeqiri të cilit sot në mëngjes iu bastis shtëpia dhe më pas u arrestua nën dyshimin se dogji veturën e gruas së zv.ministrit Bajram Gecaj.
Por, Lëvizja Vetëvendosje e ka quajtur këtë rast, montim kriminal dhe fashist kundër aktivistit Zeqiri, duke thënë se atë ditë kur u djeg vetura, aktivisti po qëndron në tendat e vendosur në shesh me aktivistë të tjerë.
VV fton policinë të kontrollojë kamerat e sigurisë të cilat janë të vendosura në ambientet e Kuvendit, me pamje nga sheshi, si dhe kamerat e sigurisë që janë në lokalin në ndërtesën e ish-Unionit, pranë të cilit ka qenë e vendosur tenda e Alket Zeqirit, si dhe të kontrolloj edhe kamerat dhe dëshmitë e dhjetra medieve që kanë raportuar vazhdimisht nga kampi me tenda.
“Alket Zeqiri, i cili është artist, skulptor, ka qenë pa u shkëputur në kamp, dhe kjo është lehtësisht e vërtetueshme.
Montimi i kësaj akuze ndaj Alket Zeqirit është vetëm një përpjekje e poshtër për t’ia lënë dikujt përgjegjësinë për ngjarjet e fundit që po ndodhin në Kosovë. Presim nga policia verifikimin e kamerave, lirimin e menjëhershëm të Alket Zeqirit, kërkesë falje ndaj familjes së tij dhe ndaj vetë atij, si dhe pushimin nga puna të zyrtarëve të policisë që po gjejnë kurban për Bajram Gecajn e për fashistët e tjerë në pushtet”, thuhet në reagimin e VV-së.
Portali tesheshi.com ka kontaktuar edhe zëdhënësin e qeverisë Arban Abrashi i cili nuk ka dashur të flas për çështjen në fjalë duke thënë se Qeveria do të dal me një qëndrim.
“Po presin raportin e policisë”, ka thënë Abrashi, për tesheshi.com.
Prokuroria po i vazhdon hetimet
Portali tesheshi.com gjatë ditës ka tentuar të marrë një prononcim edhe nga Prokuroria e Shtetit se deri ku kanë shkuar me hetime për rastin e djegies së veturave por nuk kemi marrë përgjigje.
Kryeprokurori i Prokurorisë Themelore në Prishtinë, Imer Beka, ka thënë se kanë prova të besueshme për djegien e veturave zyrtare dhe se janë duke i kryer hetimet, derisa ka konfirmuar se sot ka pasur takim me hetuesit për djegien e veturave të fundit.
Beka ka thënë se janë në proces, por nuk mund të flas shumë në detaje për shkak se mund të dëmtohen hetimet.
“Jemi në proces të hetimeve, sot kemi biseduar me policë. Kemi avancuar me hetime, jemi mirë, por njëherë nuk mund të them asgjë”, ka thënë Beka për mediat kosovare.
Ndryshe, për djegien e veturave të shtetit ka reaguar partia më e madhe në vend, Partia Demokratike e Kosovës (PDK), si dhe partia opozitare Nisma për Kosovën, që këto sulme i cilësojnë si përpjekje për destabilizim të vendit dhe krijimin e pasigurisë së qytetarëve, derisa kërkojnë nga institucionet përgjegjëse të zbardhin të gjitha raste dhe kryesit të sillen para drejtësisë. tesheshi.com/
