Edicioni i 45-të i Kupës së Amerikës, i pari i zhvilluar jashtë Amerikës së Jugut, ka nisur të shtunën, por deri tani ka qenë zhgënjyes për sa u përket paraqitjeve.
Një edicion special, që zhvillohet në Shtetet e Bashkuara të Amerikës, me pjesëmarrjen e 16 përfaqësueseve, të ndara në katër grupe me nga katër skuadra.
Në katër takimet e deritanishme janë shënuar vetëm tre gola, me dy prej sfidave të mbyllura në barazim.
Në të parën përballje, të luajtur të shtunën, të vlefshëm për grupin A, Kolumbia fitoi 2-0 ndaj SHBA-ve. Zapata dhe James Rodriguez qenë shënuesit për kolumbianët, të cilët u shfaqën dukshëm superiorë.
Në të njëjtin grup, Kosta Rika dhe Paraguaji janë ndarë me një barazim pa gola mes tyre në mbarim të së njëjtës ditë.
Dy ndeshjet e para të grupit B janë zhvilluar në të gdhirë të së dielës. Peruja ka fituar 1-0 ndaj Haitit, me një gol të shënuar nga Guerrero në minutën e 61-të.
I mërzitshëm Brazili, që ka barazuar 0-0 me Ekuadorin.
Sonte do të luhen dy ndeshje të grupit C. Xhamajkë – Venezuelë do të jetë në orën 23:00. Meksikë – Uruguaji nis në orën 02:00 të së hënës, e është një takim që premton të ofrojë lojë të fortë e të bukur.
I shumëpritur është takimi i së martës, Argjentinë – Kili, një përsëritje e finales së edisionit të shkuar, të zhvilluar një vit më herët, e të fituar nga kilianët. /tesheshi.com/
