Shtetet e Bashkuara po mbajnë një rezervë të dozave të vaksinave AstraZeneca në mënyrë që vaksinat të mund të shpërndahen shpejt te amerikanët sapo të marrë miratimin nga një rregullator mjekësor i SHBA, tha një zyrtar i lartë i Shtëpisë së Bardhë.
AstraZeneca ka prodhuar doza të vaksinës së saj në Shtetet e Bashkuara që ende nuk janë aprovuar.
Vaksina, e zhvilluar në bashkëpunim me Oxford, është miratuar për përdorim në Bashkimin Evropian dhe në një numër vendesh.
Zyrtarët amerikanë i kanë thënë BE-së se nuk pret dërgesa vaksinash nga SHBA së shpejti, raportoi Reuters.
“Ne kemi një rezervë të vogël të AstraZeneca, kështu që nëse miratohet, ne mund t’ua shpërndajmë atë stok amerikanëve”, tha Jeffrey Zients, koordinator i Shtëpisë së Bardhë për luftën kundër COVID-19.
New York Times raportoi këtë javë se dhjetëra miliona doza të vaksinës AstraZeneca janë prodhuar tashmë në Shtetet e Bashkuara dhe janë në objektet e prodhimit.
AstraZeneca njoftoi në shkurt se pret që vaksina të marrë aprovimin e SHBA për përdorim emergjent në fillim të prillit dhe të jetë në gjendje të japë menjëherë 30 milion doza në të gjithë vendin.
Pozicioni i SHBA mund të rrezikojë përpjekjet e AstraZeneca për të përmbushur detyrimet e saj kontraktuale me BE dhe për të dhënë 180 milion doza në tremujorin e dytë.
AstraZeneca i tha BE-së në fillim të këtij viti se do të zvogëlojë dërgesën e saj në tremujorin e dytë në më pak se 90 milion doza, thanë burime evropiane për Reuters, pasi tashmë kishte zvogëluar dërgesat në tre muajt e parë të 2021.
Presidenti i SHBA Joe Biden tha këtë javë se administrata së pari do të shpërndajë vaksinat e koronavirusit tek amerikanët, por do të ndajë të gjithë tepricën me botën.
Shtetet e Bashkuara janë një nga liderët në vaksinimin në botë.
Më shumë se 130 milion doza janë shpërndarë dhe gati 100 milion doza janë përdorur, tregojnë të dhënat federale nga e enjtja.
Zyrtarët e Shtëpisë së Bardhë thanë të premten se 65 përqind e amerikanëve mbi moshën 65 vjeç morën vaksinën. /tesheshi.com/
