Presidenti amerikan, Donald Trump dhe ai rus, Vladimir Putin kanë pasur një takim të dytë, që nuk u publikua, gjatë samitit të G20 në Gjermani. Lajmin e konfirmoi edhe Shtëpia e Bardhë, pasi kishte dalë në median ndërkombëtare.
Njoftimi vjen në një kohë që takimi i parë ka pasur një mbulim të hollësishëm dhe plot dyshim të medias për bisedimet dypalëshe më 7 korrik në të cilat, siç tha Trump, Putin mohoi akuzat se ai ka qenë në krye të përpjekjeve për të ndërhyrë në zgjedhjet amerikane të vitit të kaluar.
Më pas, gjatë asaj nate, Trump dhe Putin janë takuar sërish, bëri të ditur një zyrtar i Shtëpisë së Bardhë, por vetëm pasi lajmi ishte publikuar nga Ian Bremmer, presidenti i firmës konsultuese “Eurasia Group”.
Bremmer tha se atë mbrëmje kishte pasur një darkë për krerët e shteteve të G20 dhe bashkëshortet e tyre, edhe pse jo të gjithë morën pjesë. “Kishte shumë karrike bosh”, vijoi ai. “Donald Trump u ngrit nga tryeza dhe u ul afër Putinit për gati një orë. Ishte takim shumë i gjallë dhe tepër miqësor. Përkthyesi i Putinit po kryente detyrën. U ndërgjegjësova për këtë takim pasi pashë njerëzit të habitur”, tha Bremmer.
Brenda rrethit ku mund të kapje diçka nga biseda, nuk ka qenë askush, shton Bremmer, dhe nuk dihet se çfarë kanë diskutuar dy burrat. Trump nuk e mori me vete në bisedë përkthyesin e tij, që duket se mund të përbëjë shkelje të protokollit të sigurisë kombëtare.
Shtëpia e Bardhë tha më vonë se përkthyesi që shoqëronte Trump, fliste japonisht, jo rusisht, dhe kjo ishte arsyeja përse Trump dhe Putin folën përmes përkthyesit rus.
Bremmer shton: “Eshtë shumë e qartë se marrëdhënia e vetme e mirë e Trump në G20 ishte me Putin. Aleatët e amerikanëve u habitën dhe u ç’inkurajuan. Ke presidentin Trump në dallë me gjithë këta aleatë dhe me kë e kalon kohën ai?”.
I tillë ishte niveli i shqetësimit sa dikush mori përsipër t’ia sjellë në vëmendje Bremmerit. Ai tha se priste që Shtëpia e Bardhë ta bënte publike. “Qëndrova këto ditë duke shpresuar se ata do të flisnin për këtë gjë. E dija që javën e kaluar, por kjo nuk ndodhi. Jam një analist, nuk jam në biznesin e lajmeve të bujshme”, tha ai. /tesheshi.com/
