Policia britanike bëri të ditur se ka arrestuar shtatë persona përgjatë natës në lidhje me sulmin pranë parlamentit në Londër.
Arrestimet janë kryer pas bastisjeve në gjashtë adresa, ndërsa ka patur kërkime në Londër, në Birmingem dhe në pjesë të tjera të vendit.
“Mbetet ende besimi ynë se agresori që veproi i vetëm ishte i frymëzuar nga terrorizmi ndërkombëtar,” deklaroi një prej figurave kryesore të policisë metropolitane, Mark Rowley.
I njëjti zyrtar tha se mes të vdekurve kishte një përzierje nacionalitetesh, por pa shkuar më tej. Ndryshe nga ç’qe njoftuar më herët, ai foli për tre viktima nga sulmi, për punonjësin e policisë, për një grua në të dyzetat dhe për një burrë në të pesëdhjetat.
Shtatë nga të plagosurit mbeten në gjendje kritike, ndërkohë që 29 prej tyre morën trajtim mjekësor në spital. /tesheshi.com/
