Gjermania mban përgjegjëse “forca brenda partisë së Punëtorëve të Kurdistanit” për përshkallëzimin e dhunës gjatë ditëve të fundit në Turqi.
Media lokale citoi ministrin e Jashtëm, Frank-Walter Steinmeier i cili tha se episodet më të fundit të shpërthimeve e vrasjeve kërcënojnë përpjekjet për gjetjen e një zgjidhjeje paqësore për konfliktin 30-vjeçar mes shtetit turk dhe militantëve kurdë.
“Eshtë e qartë se ka gjithashtu forca brenda PKK që nuk e kanë pranuar asnjëherë heqjen dorë nga dhuna dhe tani guxojnë të degradojnë procesin e paqes në një ngërç të vërtetë”, tha Steinmeier në një intervistë me gazetën Sudwest Presse.
Sidoqoftë, ai apeloi Ankaranë të përgjigjet në mënyrë proporcionale ndaj sulmeve si një mënyrë për të ruajtur shanset e rikthimit në armëpushim dhe bisedime.
Sulmet mbi forcat e sigurisë që nga sulmi i 20 korrikut në Suruc ku u vranë 32 aktivistë, kanë një bilanc tragjik prej më shumë se dhjetë policësh dhe ushtarësh të vrarë. /tesheshi.com/
