Soela Zani është një fotografe shqiptare, e cila është specializuar për portretet e fëmijëve, e që për këtë arsye ka zënë një vëmendje të madhe në mediat e huaja, e veçanërisht në ato italiane.
“Tgcom”, shkruan për Soelën, duke treguar projektin e saj të fundit, në të cilin ka prezantuar 18 kryeveprat e artit botëror, duke vendosur në vend të figurave të tyre kryesore, fëmijë të prekur nga sindroma Down.
Qëllimi i saj është të prezantojë problemin e këtyre fëmijëve, mungesën e aftësisë tek ata, nëpërmjet shikimeve optimiste dhe të buzëqeshur, duke mësuar të vlerësojmë ndryshimet e duke treguar se si çdo qenie njerëzore mund të jetë një vepër arti.
“Hera e parë që kam njohur një person me sindromën Down ka qenë rreth vitit 1987-1988. Komunikonte shumë pak dhe vuante shumë, duke qenë se nuk ndiqte asnjë lloj terapie për tu përmirësuar. Në atë kohë të tilla sëmundje ishin tabu, nuk njiheshin nga shoqëria. Më kujtohet edhe se si familjarët e tij gjithmonë turpëroheshin nga fëmija i sëmurë”,- tregon Soela.
Prej asaj kohe e deri në ditët e sotme shoqëria ka ndryshuar dhe ka bërë hapa të padiskutueshëm përpara e vetë Soela Zani ka marrë pjesë në projekte për mbledhje fondesh në shoqëri jofitimprurëse që kujdesen për fëmijë me të tilla paaftësi. “Si është të punosh me fëmijët me sindromën Down? Tamam si të punosh me fëmijë që nuk e kanë këtë sindromë: nuk janë asnjëherë të parashikueshëm”,- tregon e reja shqiptare./tesheshi.com/
