Një kirurg maqedonas u plagos mëngjesin e së hënës gjatë shërbimit roje në spitalin qendror në Shkup. Ai u qëllua nga një shtetas shqiptar pasi i ndërroi jetë nëna, me pretendimin se mjeku nuk i kishte shërbyer. Dhe sot, një familjar i ndjerës, Sabahudin Rrustemi ka deklaruar për Zhurnal se fëmijët e pacientes së ndjerë i kishin dhënë mijëra euro kirurgut me qëllim që të kryej operacionin me përkushtim maksimal
“ Djemtë e familjares time e cila ndërroi jetë në spitalin shtetëror, kanë shitur veturën që ti japin para kirurgut. Bëhet fjalë për disa mijëra euro, të cilat ia dhanë në dorë atij, i cili u premtoi se operacioni do të kryhej me sukses, por puna ka dështuar. Por pacientja vdes dhe djemtë kanë kërkuar llogari nga kirurgu për nënën e tyre që humbi jetën. Dhe kirurgu është sjellë shumë keq duke iu thënë djemve se ‘nënën shkoni merreni në kapelë dhe mos tju shoh më në spital’. Nga ky gjest janë revoltuar tejmase djemtë e pacientes dhe njëri prej tyre ka nxjerr revolen duke shkrepur tre plumba në këmbën e kirurgut”, deklaroi Sabahudin Rrustemi.
Ndërkohë, tre personat e përfshirë në incidentin e djeshëm janë arrestuar nga policia dhe nga gjykata u është shqiptuar paraburgim prej tridhjetë ditëve.
Bëhet fjalë për vëllezërit Kajam dhe Imer Nikshiq nga Arrnaqia e Shkupit, të cilët dhanë ryshfet me shpresë se nëna e tyre do të shpëtonte nga operacioni. /tesheshi.com/
