Pas 16 vite ‘luftë’ e sorollatje nëpër Prokurori, Gjykata e Policia, më në fund, të premten në orët e mëngjesit, Alush Alushi ka marr në dorëzim shtëpinë tij në veri të Mitrovicës, pasi që policia dëboi uzurpatorin, ish-policin serb Danillo Iliç .
Zyrtarë të policisë së Kosovës në veri të Mitrovicës kanë konfirmuar për portalin ‘tesheshi’ se policia ka zbatuar urdhrin e lëshuar ditë më parë nga Gjykata Themelore e Mitrovicës, për të liruar shtëpinë e Alush Alushit që ishte e uzurpuar nga një qytetar serb.
“Policia e Kosovës ka dëbuar nga shtëpia një qytetarë serb i cili dyshohet se ka uzurpuar shtypin e shqiptarit në veri të Mitrovicë” ka thënë zëvendësdrejtori i policisë së Kosovës për veri Besim Hoti.
“Policia ka zbatuar urdhërin e lëshuar nga Gjykata Themelore e Mitrovicës, ndërsa çelësat e shtëpisë pas dëbimit të uzurpatorit i janë dorëzuar pronarit shqiptar”, sqaroi Hoti.
Alushi tha se ndihej i gëzuar pasiqë më në fund, pasi 16 viteve arriti për herë të parë të shkelë në shtëpinë e tij.
“Më në fund jam i kënaqur që pas gjithë luftës dhe shëtitjeve që kam bërë nëpër polici, Gjykata dhe Prokurori, për 16 vite drejtësia fitoi dhe unë sot mora shtëpinë time që më kishte uzurpuar ish-polici i Serbisë, Danillo Iliç” ka thënë Alush Alushi për portalin ‘tesheshi’.
“Fqinjët e mi që të gjithë ishin ardhacakë kishin dalë para dhe më fyenin duke me quajtur zhuganë, ‘shiptar’ dhe ik nga këtu se nuk ke vend”, ka thënë Alushi. /tesheshi.com/
