Polonia është çerekfinalistja e parë e Euro 2016-tës. Zvicra është e eliminuara e parë e një të tetave.
Një ndeshje ku është luajtur për 120 minuta, e ku është dashur të gjuhen 11-metërshat që të mësohet fituesi.
Një takim ku për protagonistë kanë qenë sërish shqiptarët, ata që për nga origjina janë të tillë. Shaqiri do t’i jepte shpresë Zvicrës me një gol të jashtëzakonshëm, mbase më i bukuri i këtij Europiani, kurse Granit Xhaka do të humbiste penalltinë e tij, duke sjellë eliminimin.
Polakët do të paraqiteshin shumë më mirë në pjesën e parë të lojës, me një dominim të plotë ndaj zvicerianëve. Këta të fundit do të bënin shpesh gabime elementare, duke vuajtur presionin e një sfide të tillë.
Blaszczykowski do ta kalonte Poloninë në epërsi në minutën e 39-të. Zvicerianët do të kujtoheshin të reagonin nga fundi i lojës, kur edhe do të vijë goli i shkëlqyer i Shaqirit. Një ekzekutim i përsosur i tij jashtë zonës së 16-metërshit, me një top të goditur me kurriz nga porta. Eshtë minuta e 82-të, 1-1!
Zvicerianët do ta merrnin situatën në dorë pas barazimit, por në minutat e mbetura nuk do të arrinin të shënonin një gol të dytë. Shtesat nga 15 minuta do të flisnin po ashtu për ta, por barazimi 1-1 do të mbetej në fuqi.
Kur u vjen radha 11-metërshave, nga të dhjetë lojtarët që i gjuajtën ato, është vetëm Granit Xhaka që gabon. Një top i goditur keq nga ai, që përfundon diçka më tutje shtyllës pingule në të djathtë të portierit polak.
Polonia fiton 5-4 me 11-metërsha dhe shkruan emrin në çerekfinale. /tesheshi.com/
