Nga Mensur Krasniqi
Ndërsa banorët e vendbanimeve shqiptare vuajnë për kushte ekzistenciale si ujë dhe kanalizim, ku jeta për ta është shndërruar në “ferr”, në komunën Aerodrom të Shkupit, komunë kjo e banuar tërësisht me maqedonas do të ndërtohet “Parku i Parajsës”.
Ky park në bazë të informacioneve që ka siguruar portali tesheshi.com, është propozuar që të ndërtohet sipas vendimit që ka marrë qeveria me investim të ndërrmarrjes shtetërore “ELEM”(Elektrana e Maqedonisë). Këtë informacion e kanë konfirmuar eksluzivisht për portalin tesheshi.com nga vet ndërrmarja “ELEM”, pasi siç thonë ata nuk mund të refuzojnë vendimet qeveritare.
“Sa për informatë të juajën projekti për parkun e parajsës nuk është i yni, por i qeverisë. Ata kanë sjellë vendim për ndërtimin e parkut, ndërsa investimi i’u është ngarkuar “ELEM-it”. Komuna Aerodrom ka kryer të gjitha dokumentacionet për fazën paraprake, tani ka mbetur vetëm realizimi i ndërtimit. Tani ne jemi të obliguar të merremi me fazën e fundit”, thonë nga “ELEM” për portalin tesheshi.
Parku në fjalë sipas “ELEM” do të kushton rreth 15 milion eurosh, ndërsa do të jetë gati gjatë dy viteve të ardhshme. Në këtë park do të ketë kafshë të ndryshme, si majmunë, kaproj, fazanë, drenë. Gjithashtu sipas plan projektit pritet të ndërtohet një liqen artificial me shumë ura të ndryshme, dhe një restorant luksoz në formë të anijes.
Ndërtimi i “Parkut të Parajsës” ka shkaktuar revoltë të madhe ndër qytetarët e vendbanimeve shqiptare, ngaqë “ELEM” është ndërmarrje shtetërore e cila financohet edhe nga taksapaguesit shqiptar.
Nga ana tjetër partitë politike shqiptare ende nuk kanë rreaguar ndaj këtij skandali.
Sipas ekspertit ekonomik, Nasir Selimi, ndërtimi i “Parkut të Parajsës” paraqet marrëzirën e rradhës të kësaj qeverie. Ai për portalin tesheshi.com ka thënë se koalicioni qeverisës VMRO-BDI ende nuk mjaftohen me shpenzimet kolosale shterpë për realizimin e projektit “Shkupi 2014” dhe kjo tani që paralajmërohet me parajsën është ndoshta “margaritari” i fundit i saj. Selimi ka rikujtuar BDI-në që ELEM-i financohet edhe nga djersa e shqiptarëve, andaj duhet parandaluar një diskriminim i tillë.
“Keqpërdorimi dhe abuzimi i parave të popullit në këto situata të vështira ekonomike, (siç rrjedhin gjërat situata pritet të përkeqësohet akoma më shumë), vërtet është budallaki e sojit të vet. ELEM-i u ndërtua nga djersa e të gjithë taksa paguesve, pra edhe të atyre shqiptarë, ndërsa diskriminimi dhe abizimet më i madh bëhet pikërisht nga kjo ndërmarrje shoqërore”, ka deklaruar Nasir Selimi, për tesheshi.com.
Që absurdi të jetë më i madh, sipas Selimit kjo ndodh në kohën kur shtetasit e Maqedonisë vuajnë për gjërat e domosdoshme sikurse janë: mungesa e barnave të nevojshme nëpër ambulanca dhe spitalet e vendit, mungesa e sigurimit të ujit të pijshëm nëpër shumë vendbanime shqiptare, numrit më të madh të të papunëve të vendit në rajon, varfërisë ekstreme që ka kauluar vendin, vonesën e rrogave dhe ndihmave sociale etj.
“Me siguri nga realizimi i këtij projekti janë paraparë përfitimet e disa individëve, sepse është koha më e përshtatshme për shpërlarjen e parave, por nuk mund të kuptohet indiferenca dhe mos ndikimi i pjesëmarrëve shqiptarë në qeveri. Nëse “gjaku rinor” i ministrave shqiptar në qeverinë e vendit kësaj rradhe nuk reagon dhe të ndikon që ELEM-i të financon ndonjë projekt të ngjashëm në vendbanimet shqiptare ose në ndërtimin e ndonjë objekti tjetër infrastrukturor, atëherë kot shpresojmë në vargjet e Migjenit “qeshu rini qeshu, bota është e jote”, madje do të vemë shenjën e barazimit me kolegët e tyre paraprak”, përfundoi Selimi. /tesheshi.com/
