Ndërsa në Shqipëri ironizohen apelet qeveritare për kursimin e energjisë, posaçërisht ato të ministres Balluku, e cila pa komplekse orienton dhe gradacionin e lavatriçes, në vendet përreth këshillat shkojnë dhe më tej.
Kështu, në Mal të Zi, një vend që gjithsesi plotëson nevojat e brendshme për energji, veç këshillimit për mospërdorim të ashensorit apo kalim në dritat LED, diktohet dhe nikoqirllëku te kapaku i tenxheres.
Më saktë, qeveria u thotë amvisave se “duhet zjeni ushqimin në një enë të mbuluar, sepse kjo kursen deri në 20 për qind të energjisë”.
Diktohet gjithashtu dhe temperatura në shtëpi. “Kur bëhet fjalë për ngrohjen e shtëpisë, temperatura e rekomanduar për dhomat ku qëndroni gjatë është nga 20 deri në 21 gradë, kur flini deri në 18 gradë dhe kur dilni nga shtëpia gjatë ditës deri në 16 gradë, d.m.th. maksimumi 10 gradë në rast mungesash më të gjata”.
Gjithashtu, ftohen qytetarët që “të përdorin sa më shumë diellin për ndriçim gjatë ditës”, dhe gjatë sezonit të ngrohjes të ulin grilat dhe të tërheqin perdet gjatë natës, të mos i mbulojnë radiatorët me mobilje dhe rroba dhe të lajnë rrobat në temperature sa më të ulëta, të thahen në ajër e jo në lavatriçe”. /tesheshi.com/
