Me afrimin e zgjedhjeve parlamentare në vend, po lëvizin edhe marrëveshjet politike nga partia në pushtet, e cila është tej konsumuar dhe ka rrezik real që të vijnë në pushtet filoserbët.
Pas një sherrnaje të përhershme mes veti, forcat politike shqiptare kanë arritur një marrëveshje me partinë e Gjukanoviçit që qyteti i Tuzit të marrë statusin e bashkisë, ndërkohë që aktualisht është një njësi bashkiake e kryeqytetit Podgoricë.
Deputeti i “Forca”-s, Genci Nimanbegu, deklaroi për televizionin “Teuta” të Ulqinit se ligji i ri për statusin e Tuzit erdhi si rezultat i marrëveshjeve të subjekteve politike që veprojnë atje, me Partinë Demokratike të Socialistëve (DPS).
Nimanbegu tha se “Forca” nuk ka marrë pjesë në këto marrëveshje, kurse arsyet pse ai votoi kundër kanë të bëjnë me disa ndryshime në ligj në momentet e fundit, dhe faktin që ai nuk do të hyjë në fuqi deri në vitin 2018.
Në prag të votimit në Kuvendin e Malit të Zi, 16 nga 22 këshilltarët e Kuvendit të Tuzit nënshkruan iniciativën me të cilën i bëhej thirrje Kuvendit të Malit të Zi që ligji të votohej.
Zgjedhjet
Zgjedhjet parlamentare pritet të zhvillohen në vjeshtën e këtij viti ndaj dhe lëvizjet kanë nisur të shtohen. Pesha e partive etnike siç janë ato shqiptare dhe ato boshnjake por rritet.
Kryetari i Aleancës Qytetare, Boris Raoniq, tha për gazetën “Dan” se mandatet e pakicave do të jenë vendimtarë për formimin e pushtetit pas zgjedhjeve të ardhshme, edhe pse partitë qytetare synojnë gjithnjë e më tepër elektoratin e tyre.
Sipas Raoniq, Partia Boshnjake ka mundësi reale të marrë mandatin e katërt të deputetit, pasi ka strukturë të fortë partiake dhe mban pushtetin në tri komuna.
Sa u përket partive shqiptare, Raoniq tha se vetëm “Forca” mund të sigurojë mandatin pa hyrë në koalicione, kurse të tjerave do t’u duhen kombinime të ndryshme për arritjen e këtij qëllimi.
Shqiptarët sipas ligjit aktual kanë mundësi reale të kenë tre mandate, por si rezultat i përçarjeve primitive lokaliste, politike dhe shpesh edhe atyre fetare, rrezikojnë edhe mandatin e dytë. /tesheshi.com/
