Ndodhi ajo që ishte paralajmëruar edhe pse u kërcënuan hapur nga shefi i diplomacisë serbe, Ivica Daçiç.
Këshilltarët shqiptarë të tri qyteteve të Luginës: Preshevës, Medvegjës dhe Bujanocit, miratuan Deklaratën për themelimin e Asociacionit të Komunave me shumicë shqiptare në Serbi.
Në këtë mënyrë është zbatuar atë që Edi Rama kërkoi gjatë vizitës që zhvilloi në Beograd dhe Preshevë një vit më parë.
Kryeministri Rama kërkoi që shqiptarët e Preshevës duhet të kenë të njëjta të drejta si serbët e veriut të Kosovës.
Deklarata u miratua në mënyrë unanime nga të gjithë, përkatësisht 43 këshilltarët komunalë nga të tri komunat.
Kryetari i Preshevës, Ragmi Mustafa, gjatë mbledhjes tha se është një ditë historike. Ai tha se shqiptarët e Luginës, çdo ditë janë nën trysninë e deklaratave kërcënuese të qeverisë së Serbisë.
Ndërkaq, kryetari i Këshillit Nacional Shqiptar, Jonuz Musliu, tha se rrugë tjetër nuk ka përveç realizimit të të drejtave të shqiptarëve të Luginës.
Sipas tij, Serbia gjithmonë ka qenë e interesuar për spastrim etnik dhe marrjen e tokave shqiptare. Musliu theksoi se shqiptarët janë të vendosur që të realizojnë vullnetin e tyre dhe asgjë më shumë.
Në mbledhje nuk morën pjesë përfaqësuesit e opozitës në Preshevë, përkatësisht Partia e Veprimit Demokratik e deputetit Riza Halimi.
Ministri i Jashtëm i Serbisë, Ivica Daçiç, paralajmëroi dy ditë më parë që shqiptarët të “mos luajnë me zjarrin”.
“Ua tërheq vërejtjen që të shtunën në Preshevë të mos bëjnë ndonjë paralele me Asociacionin e komunave serbe në Kosovë. Ua tërheq vërejtjen të mos luajnë me zjarrin dhe të respektojnë kushtetutën dhe rendin e Republikës së Serbisë. Fakti që Serbia është për bisedime nuk do të thotë se është e dobët, përkundrazi ajo është e fuqishme, më e fuqishme në 20-30 vjetët e fundit”, ka thënë Daçiç nga Medvegja.
/tesheshi.com/
