Dita “D”, kështu quhet dita e sotme në Shkup. Në këtë ditë pritet të mbahen protesta madhështore të opozitës shqiptare në Maqedoni, të organizuara nga Këshilli Opozitar. Protesta me moton “Drejtësi, Dinjitet dhe Demokraci”, sipas organizatorëve ka për qëllim të tregojë se jo të gjithë shqiptarët janë të nënshtruar dhe të përulur para shefave të VMRO-së.
Në konferencën paralajmëruese për protestën e sotshme Rufat Halili, nga Këshilli Opozitar, ka thënë se protesta është shtegu i vetëm për të treguar që edhe përkundër koalicionit VMRO-DPMNE-BDI për të bërë shkarje nga Evropa, shqiptarët nuk shohin asnjë rrugë tjetër pos Evropës.
“Kjo protestë duhet të ngrejë zërin edhe kundër të gjithë atyre që kanë lejuar, kanë bërë ose kanë inskenuar procese të montuara politike, për shkak të të cilave sot po kalben burgjeve dhjetëra shqiptarë të pafajshëm. Nëse nuk reagojmë, ata janë në gjendje t’i përsërisin ata skenarë. Prandaj duhet të reagojmë dhe të protestojmë. Duhet të protestojmë edhe për arsye se neve na është marrë e drejta demokratike e votës, sepse çifti VMRO – BDI gjithnjë kishin manipuluar vullnetin tonë dhe ne gjithnjë kemi dalë humbës”, ka deklaruar Rufat Alili nga Këshilli Opozitar.
Protesta do të nisë nga parku i Çairit në orën 17:30 dhe para orës 18:30 do të ndalojë para qeverisë. Aty do të lexohet deklarata e protestës dhe do të mbahen vetëm dy fjalime nga dy përfaqësues të Këshillit Opozitar. 
Kjo protestë, për nga mënyra e organizimit dhe aktiviteti paraprak thuhet të jetë njëra ndër protestat më shembullore. 10 ditë rresht aktivistët opozitarë nuk kanë ditur për fjalën lodhje. Ata përveç grafiteve dhe posterave, nuk kanë hezituar të trokasin derë më derë për t’ia shpërndarë ftesat çdo shqiptari në tërë Maqedoninë.
Me protestën e sotme tashmë janë solidarizuar dhe kanë paralajmëruar prezencën e tyre shumë organizata joqeveritare, familjarë të dëshmorëve të UÇK-së, familjarët e të dënuarve në rastin “Monstra”, “Sopoti”, “Lagjes së Trimave” si dhe personalitete të ndryshme si nga jeta politike, kulturore, artistike etj. M. Krasniqi – /tesheshi.com/
