Nga Mensur Krasniqi
Pas 5 ditëve resht të protestave të organizuara nga organizatat joqeveritare dhe të përmbajtura edhe nga i tërë blloku politik opozitar maqedonas kundër pushtetit aktual, së fundmi këtyre protestave do t’i bashkangjiten edhe partia e parë politike shqiptare, Lëvizja BESA.
“Duke iu referuar konkluzioneve të mëparshme që i ka marrë Kryesia e Lëvizjes BESA, si dhe qëndrimit të SHBA-ve dhe BE-së se nuk janë përmbushur kushtet e nevojshme për zgjedhje të drejta dhe demokratike, por edhe faktit se Kryetari i shtetit tashmë e ka suprimuar punën e Prokurorisë Speciale Publike, madje e ka rrezikuar edhe vetë Marrëveshjen e Përzhinës, Lëvizja BESA ka vendosur që t’i mbështesë të gjitha aktivitetet e shoqërisë civile, që organizohen në drejtim të pengimit të organizimit të zgjedhjeve më 5 qershor dhe që kanë për qëllim rikthimin e demokracisë në vend dhe riparimin e institucioneve tashmë të rrënuara”, thonë nga Lëvizja BESA.
Për këto arsye, si dhe duke pasur parasysh se ky regjim është dëshmuar edhe si regjimi më antishqiptar, anti-NATO dhe anti-BE dhe i cili e ka kapur keq edhe vullnetin politik të shqiptarëve duke i kapur partitë shqiptare në pushtet, Lëvizja BESA i mbështet këto protesta, sepse ato sipas tyre janë mënyra e fundit e shpëtimit të këtij vendi dhe e kthimit të demokracisë.
I pyetur nga portali tesheshi.com çfarë konkretisht paraqet vendimi i Lëvizjes BESA për mbështetje të protestave të organizuara nga organizatat qytetare kundër këtij regjimi, kryetari i Forumit Rinor të kësaj lëvizjeje, Daim Luçi thotë se nga protesta e ardhshme do të ketë edhe anëtarë të Kryesisë Qendrore të BESA-s që do të përkrahin protestuesit në çdo protestë.
Ky vendim i Lëvizjes Besa për mbështetjen e protestave është mirëpritur nga shumica e qytetarëve po edhe nga analistë politikë të vendit. Sipas analistit Ali Maksuti, vendimi i Lëvizjes BESA për të përkrahur protestat është në përputhshmëri me kërkesat e çdo qytetari shqiptar që dëshiron të mar fund kriminaliteti i pushtetit aktual.
“Pas vendimit te kryetarit të shtetit për falje të disa funksionarëve të përfshirë në procesin e hetimit nga Prokuroria Speciale, vendi shkon duke u zhytur në krizë më të thellë politike dhe pa zgjidhje, që sjell edhe pozitë të rëndë sociale, ekonomike të vet qytetarëve, prandaj edhe qytetarët e Maqedonisë kërkojnë rrugëdalje vet nga kjo situatë duke e shpreh me anë të protestave. Kurse partia shqipëtare në pushtet si vasale besnike e VMRO-DPMNE-s nga njëra anë duke kontribuar në futjen e shtetit në këtë rrugë pa zgjidhje, kurse nga ana tjetër duke larguar vendin nga proceset integruese , në BE dhe NATO,sikur duket është paraqit nevoja që Lëvizja BESA vetëm se të shpreh qëndrimin e popullatës shqipëtare se duke mbështetur çdo mënyrë të reagimit, qofshin ato protesta nga ana e shoqërisë civile ,se ky pushtet duhet të mar fund dhe qytetarët të jenë të lirë, të sigurt, të qetë dhe shteti të kthehet në gjendje stabile. Vendimi i Lëvizjes BESA për të përkrahur protestat është në përputhshmëri me kërkesat e çdo qytetari shqipëtar që dëshiron të mar fund kriminaliteti, pa siguria, orientimi i gabuar i deri tanishëm i shtetit në politikat e jashtme dhe të vendoset dhe te kthehet demokracia stabile në shtet”, deklaroi për portalin tesheshi, Ali Maksuti.
Ndërkaq, studenti më i dalluar shqiptar në Maqedoni, Ariton Rama mendon që të gjitha partitë opozitare shqiptare do ta shfrytëzojnë protestën si instrument demokratik kundër vendimit për amnisti për gjithë politikanët e inkriminuar që solli para pak ditësh presidenti i shtetit Gjorgji Ivanov dhe regjimit të ish kryeministrit Nikolla Gruevski.
“Me sa kam informacione jo vetëm Lëvizja Besa por edhe disa parti tjera opozitare nga blloku shqiptar tashmë e kanë të paraqitur gadishmërin për të protestuar ndaj vendimit të presidentit Ivanov. Protesta karakterizon natyrë opozitare dhe demokratike ku padyshim që partitë shqiptare në bllokun opozitar e shfrytezojnë si mekanizëm instrumental demokratik për ti shprehur qëndrimet dhe kërkesat e tyre që janë konform interesave të veta dhe elektoratit që i përkrahin. Njëkohësisht protestat momentale po zhvillohen edhe kundrejt ish kryeministrit Nikolla Gruevski, që tashmë ka kaluar vijën e kuqe me regjimin e tij autokratik”, shprehet për tesheshi.com studenti më i dalluar shqiptar në Maqedoni, Ariton Rama.
Me të mësuar mbi vendimin e Lëvizjes Besa si parti e parë politike shqiptare që do përkrah protestat e sektorit civil, gazetari i njohur Muhamed Zekiri ka përshëndetur këtë akt. Ai në profilin e tij në facebook shkruan kështu: “BESA partija e parë shqiptare që mori vendim dhe publikisht mbështet protestat e inicuara nga organizatat qytetare kundër regjimit. JU LUMTË!!!”.
Ashtu siç kanë informuar organizatat joqeveritare protestat pritet të vazhdojnë nga dita e nesërme. Sot nuk do të protestohet. /tesheshi.com/
