Më shumë se 20 policë dhe demonstrues të lënduar dhe shumë qytetarë të arrestuar – është ky bilanci i protestave të mbrëmshme në Shkup, të parat në formë të dhunshme prej kur ka filluar afera e përgjimeve.
Zëdhënësi policor Ivo Kotevski, deklaroi se 15 policë janë lënduar, por nuk dha shifrat se sa qytetarë kanë përfunduar në spital dhe në polici.
Protesta u organizua pas publikimit të audio-materialeve lidhur me vrasjen e të riut Martin Neshkovski nga policia dhe tentimit të kryeministrit Gruevski, që të fshëhë këtë detaj dhe ta paraqesë si vrasje e kryer nga një person fizik, për çka dy deri tre mijë qytetarë u tubuan para qeverisë të cilët zbritën flamujt në gjysëm shtizë, ndërsa e gjuanin qeverinë me vezë duke brohoritur “Vrasës!” dhe “Duam dorëheqje!”.
Situata atje ishte relativisht e qetë deri në ora 21, atëherë kur policëve që siguronin godinën qeveritare nuk u erdhi përforcimi i cili me dhunë bëri pastrimin e qytetarëve para godinës, gjë e cila shkaktoi tollovinë dhe përleshjen e demonstruesve me policinë.
Një karakteristikë e veçantë e kësaj proteste, ka qenë diversiteti etnik i protestuesve, të cilët na thanë se qytetarët në Maqedoni kanë kuptuar se kanë armikun e përbashkët, të cilin e identifikuan te qeveria.
Protestat e nisura mbrëmë në Shkup, janë pasqyruar dhe në raportet e agjencive dhe gazetave më prestigjoze në botë, të cilat theksin e kanë vënë te dhuna dhe brutaliteti.
“Përleshje të ashpra në kryeqytetin maqedonas mes policisë dhe demonstruesve që protestonin për vrasjen e 22-vjeçarit i cili është rrahur dhe vrarë nga policia gjatë festimeve pas zgjedhjeve të 2011”, shkruan në raportin e saj agjencia e lajmeve Associated Press, e cila sqaron se kjo ka ardhur pasi lideri i opozitës maqedonase ka akuzuar kryeministrin se është përpjekur të fshehë vrasjen.
Agjencia e lajmeve Reuters, shkruan se në protesta kishte mbi 2 mijë njerëz, disa prej të cilëve kanë djegur kontejnerët dhe kane gjuajtur me gurë policinë e cila ka mbrojtur godinën qeveritare.
Agjencia përkujton se Gruevski është një konservativ që mban pushtetin për nëntë vite dhe është në konflikt me liderin e LSDM-së, Zaev, që paraqet kërcënim për demokracinë e brishtë në shtet.
Edhe prestigjiozja amerikane The Washington Post, ka raportuar për dhunën e mbrëmshme në Shkup. Përleshjet i përshkruan të dhunshme të cilat sipas gazetës kanë shpërthyer lidhur me vdekjen e një 22-vjeçari të rrahur nga policia gjatë festimeve pas zgjedhjeve të vitit 2011, ndërsa citon zëdhënësin policor të ketë thënë se gjatë përleshjeve janë plagosur 15 policë. /tesheshi.com/
