Përplasja për përdorimin e gjuhës shqipe ka ndodhur sërish në Maqedoni sot gjatë debatit në Kuvend.
Deputeti i VMRO-së, Ilija Dimovski ka sulmuar për herë të dytë kryeparlamentarin Talat Xhaferi, i cili ka folur shqip gjatë seancës parlamentare.
Dimovski tha se, Xhaferi mund të flasë shqip në foltoren e parlamentit dhe jo në ulësen e kryeparlamentarit.
Deputeti i Gruevskit akuzoi Xhaferin se “po shkel procedurat, kushtetutën duke bërë provokime të ulëta me gjuhën shqipe”.
Dimovski, megjithatë tha se VRMO nuk do të reagonte ashpër dhe nuk “do të bjerë pre e provokimeve”.
Ndërkaq, kryeparlamentari Xhaferi theksoi se në cilësinë e deputetit do të vazhdojë të flasë në gjuhën shqipe, ndërsa si kryeparlamentar në gjuhën maqedonase.
“Për pjesën procedurale, unë po flas si deputet. Derisa sa më drejtoheni si deputet, unë do të përgjigjem në gjuhën shqipe. Ashtu si do të më drejtoheni, ashtu do të përgjigjem. Këtu nuk ka shkelje procedurale”, u shpreh Xhaferi.
/tesheshi.com/
