Ligji për gjuhët – ose ndryshe shqipen – i kthyer sërish për miratim pas mosdekretimit të nga ana e Presidentit Ivanov, është bërë shkak të rikthimin e trazirave në Kuvendin e Maqedonisë. Ishin deputetët e opozitës ata, posaçërisht të VMRO-së, të cilët krijuan një atmosferë të tensionuar pasi nuk donin futjen e ligjit në rendin e ditës. Deputeti i kësaj force, Ilija Dimovski, madje u përplas dhe me kryetarin Talat Xhaferi, duke pretenduar se pikërisht ai po e trazon situatën.
“Nuk po i drejtohem askujt, po ju drejtohem juve si koleg i vjetër… Ju lutem sinqerisht që ti përmbahemi formës së procedurave që të mos shkaktojmë sërish ndonjë situatë në Kuvendin”, u shpreh Ilija Dimovski.
Dhe ia arritën qëllimit pasi nga ana e tij, Xhaferi e ka anuluar debatin mbi ligjin në leximin e tretë, i cili u vendos si pikë e tetë e rendit të ditës të seancës së 32-të. Ai tha se debati do të vazhdojë rreth kësaj pike pasi të përmbushen kushtet për këtë.
“Përpunimi i 35.569 amendamenteve nuk ka përfunduar. Duke pasur parasysh detyrimin procedural për të përkthyer këto amendamente, pra kushtet formale për hapjen e diskutimit për këtë pikë nuk janë përmbushur”, tha Xhaferi.
Edhe pas të gjitha debateve, gjithçka që fitoi VMRO-DPMNE është koha. Rendi i ditës mbeti i njëjtë, kurse shqipja është si pikë e tetë. Partia opozitare me dorëzimin e më shumë se 35 mijë mendamenteve bëri të qartë se do të tentojë që sa më shumë ta zvarrisë sjelljen e ligjit, madje me zvarritje filloi që nga votimi i rendit të ditës. Vetëm për arsyetimin e këtyre amendamenteve nga propozuesi do të duhen më shumë se 7 muaj.
Ndërkohë një grup qytetarësh, përfaqësues të shoqatave të ndryshme kanë protestuar para ndërtesës së Kuvendit, kundër ligjit të gjuhëve si dhe ndryshimit të emrit kushtetues. Protestuesit gjithashtu vazhduan të mbledhin firma kundër qeverisë “Zaev”. /tesheshi.com/
