Ligji për përdorimin e gjuhëve, që avancon atë shqipe, i cili u votua në Kuvendin e Maqedonisë më 11 janar me 69 vota pro, asnjë kundër, asnjë të përmbajtur, presidenti Ivanov vendosi që të mos e nënshkruajë pasi e quajti antikushtetues.
Duke komentuar vendimin e tij, kryeministri Zoran Zaev thotë se duhet të kemi besim në sistemin dhe theksoi se ligji nuk ka të asnjëfarë të metash, ndryshe nga ç’pretendon presidenti Ivanov.
“Gjithçka që është konstatuar në ligjin për përdorimin e gjuhëve është në kuadër të amendamentit 5 të Kushtetutës. Nëse diçka bie në kundërshtim më Kushtetutën, kemi Gjykatë Kushtetuese dhe prononcimi i Komisionit të Venecias. Duhet të kemi kujdes më deklarata pasi që përfundimisht kjo çështje politike duhet të mbyllet, t‘i përkushtohemi jetës më të mire dhe perspektivave më të mira për të gjithë qytetarët”, u shpreh Zoran Zaev.
Nga ana tjetër, sipas kreut të BDI-së Ali Ahmeti, do të vazhdohet sipas procedurave deri në miratimin e plotë të ligjit dhe se nuk ka nevojë për amendamente shtesë, pasi që gjatë hartimit të ligjit është analizuar çdo rresht i kushtetutës. Ai tha se Ivanov nuk e shfrytëzoi mundësinë që të përmirëson imazhin tek komuniteti shqiptar
“Nuk e kemi mirëpritur vendimin e z.Ivanov. Edhe pse presidenti pati një shans për të përmirësuar imazhin e tij përpara komunitetit shqiptar, përpara qytetarëve të tij që nuk janë të paktë në Republikën e Maqedonisë, por për fat të keq kjo nuk ndodhi”, tha Ali Ahmeti.
Arsyetimi i Ivanov për mosdekretimin e ligjit ka arritur në Kuvend. Kryetari Talat Xhaferi, pas shqyrtimit, qëndrimin e Ivanovit duhet ta ndajë me deputetët. Në bazë të arsyetimeve dhe konstatimeve të Presidentit, deputetët kanë të drejtë përsëri të parashtrojnë amendamente. Brenda 30 ditëve, në bazë të vlerësimeve të kryetarit të Kuvendit, thirret seancë parlamentare ku edhe ligji i nënshtrohet leximit të tretë, respektivisht votimit të sërishëm.
Miradie Hasani – /tesheshi.com/
