Siç dhe në nisje të krizës energjitike, zgjidhja për Kosovën ka ardhur nga Shqipëri në këtë kohë kur po troket ndërprerja e dritave ende pa adhur dimri, duke qenë ende në verë.
Ministria e Ekonomisë e Kosovës ka bërë të ditur në pasditen e së hënës se qytetarët e Kosovës do të furnizohen me energji elektrike pa ndërprerje, duke sqaruar se zgjidhja është gjetur pas një bashkëpunimi me Shqiërinë.
“Duke u nisur nga situata botërore me krizën energjetike që ka prekur edhe rajonin, të gjitha institucionet përgjegjëse po punojnë intensivisht dhe në koordinim për sigurinë e furnizimit me energji elektrike.
Falë kësaj pune dhe bashkëpunimit mes Kosovës dhe Shqipërisë, përkatësisht Korporatës Energjetike të Kosovës (KEK) dhe Korporatës Elektroenergjitike të Shqipërisë (KESH) është arritur që të evitohen reduktimet që nga ora 14:00 dhe të vazhdojë furnizimi i rregullt me energji elektrike.
Institucionet do të vazhdojnë të bëjnë përpjekjet maksimale për të ruajtur furnizimin e rregullt me energji elektrike gjatë ditëve në vijim.
Megjithatë, marrë parasysh situatën, luten të gjithë qytetarët dhe bizneset që të marrin masa kursimi dhe të jenë sa më të kujdesshëm në përdorimin e energjisë elektrike.
Bashkëpunimi me Shqipërinë do të pasohet nga të tjera masa në adresim të krizës energjetike dhe gjendjes së emergjencës ku ndodhemi”, thonë autoritetet qeveritare kosovare nga ministria e linjës.
Më herët, në orët e vonë të së dielës, KEDS njoftoi se qytetarët e Kosovës do të përballeshin me reduktime nga 15 gushti.
KEDS-i e ka arsyetuar këtë vendim me çmimet e larta për blerje të rrymës në tregjet ndërkombëtare.
Muajin e kaluar, KEDS po ashtu ka paralajmëruar një dimër “shumë të pasigurt” për shkak të krizës energjetike që ka prekur Evropën.
Dy termocentralet në Obiliq, Kosova A dhe B mund të prodhojnë energji deri në 800 megavat në orë, kurse nevojat e konsumatorëve, gjatë dimrit, arrijnë deri në 1.300 megavat në orë.
Në Kosovë, rreth 94 për qind e energjisë prodhohet nga djegia e thëngjillit, ndërsa rreth 6 nga burimet e ripërtërishme sikurse hidrocentralet, centralet me erë dhe panelet diellore.
Nga ana tjetër, Shqipëria duket se do e gjejë zgjidhjen në Turqi në lidhje me atë sasi energjiqë i duhet për nevojat e saj, siç paratha kryeministri Rama pak ditë më parë nga Ankaraja, gjatë një takimi me Erdogan. /tesheshi.com/
