Autoritetet shqiptare njoftuan sërish se vendi mbetet ende i pastër nga prania e koronavirusit, e kjo pas tre testimeve të radhës.
“Ministria e Shëndetësisë dhe Mbrojtjes Sociale informon se mëngjesin e sotëm ka përfunduar testimi i tre rasteve të reja të dyshuara në laboratorin e virologjisë në Institutin e Shëndetit Publik, me histori udhëtimi me vendet e prekura nga koronavirusi COVID-19, të cilat kanë rezultuar NEGATIVE.
Deri në këto momente janë testuar 26 raste për koronavirusin e ri.
Duke ju ftuar t’i referoheni burimeve zyrtare, Ministria e Shëndetësisë dhe Mbrojtjes Sociale ju bën me dije se do të informojë në vijimësi për situatën në vendin tonë”, thuhet në një njoftim për shtyp.
Nga ana tjetër, virusi i ardhur nga Kina ka hyrë tashmë në Ballkan, por jo deri të shqiptarët, përfshirë dhe ata të Kosovës apo Maqedonisë Veriore, ndonëse në këtë të fundit u shfaq një rast pak ditë më parë.
Ndër vendet e tjera të Ballkanit ku është raportuar prani koronavirusi janë Kroacia, Rumania dhe Greqia. /tesheshi.com/
