Shqipëria do t’i japë qymyr Maqedonisë së Veriut dhe Serbisë dhe me këtë lëndë djegëse, dy shtetet do të prodhojnë më shumë energji, dhe një pjesë do t’i kthehet mbrapsht vendin tone, sqaroi ministrja Balluku në kuadër të samitit të radhës së Open Balkan, mbajtur në Beograd.
“Serbia dhe RMV e blejnë këtë nga vendet e tjera de na kanë shtruar kërkesën për bashkëpunim, pra duke marrë qymyrin tonë ne mund të përfitojmë një pjesë nga energjia e prodhuar prej tyre”, tha Balluku nga kryeqyteti serb.
Kjo është alternativa që qeveritë e Ballkanit të Hapur kanë zgjedhur në krizën që po kalon sistemi energjetik, pasi nëntoka shqiptare fsheh depozita të mëdha qymyri.
“Në vendin tonë kemi depozita që arrijnë në 700 mln tonë, do ishte e udhës që të përdorej nga fqinjët tanë”, tha ministrja.
Ndryshe nga Shqipëria, e cila prodhon energji elektrike përmes ujit, nga hidrocentralet, në Maqedoninë e Veriut dhe Serbi, rryma prodhohet nga djegia e lëndëve fosile, formë kjo që gjithsesi rrit emetimet e gazit në atmosferë.
Por në krizën e rëndë energjitike që ka trokitur, klima apo ndotja ka kaluar në plan të dytë. /tesheshi.com/
