Të mësuar me medalje vetëm në peshënjgritje, Shqipëria u nderua më në fund me një të artë në atletikë, një disiplinë që vitet e fundit ka vetëm një emër në konkurime ndërkombëtare të niveleve të larta: Luiza Gega.
Është pikërisht kjo e fundit që doli kampione Europe në 3000 metra me pengesa, në Europianin e Atletikës që po mbahet në Mynih. Ishte ky një kurorëzim i arritjeve të shumta të Gegës në pistën e vrapimit.
Ajo qe dominuese gjatë garës, duke e përfunduar me kohën 9’11”31.
Kjo erdhi natyrshëm, pasi kampionia shqiptare shkoi në finale me kohën më të mirë të regjistruar në fazën kualifikuese dhe ishte pretendente kryesore për të fituar garën.
Këtë e tregoi duke diktuar ritmin dhe duke marrë kryesimin që pas 100 metrave të parë.
Ndaj, atletja shqiptare ia doli të kalonte finishin e vetme duke thyer me 6 sekonda rekordin të vendosur në vitin 2010 nga rusja Zaripova. /tesheshi.com/
