Pas sulmeve terroriste që ndodhën mbrëmjen e djeshme në aeroportin e Stambollit, të menjëhershme kanë qenë mesazhet e solidaritetit dhe të ngushëllimit nga ana e autoriteteve shqiptare kundrejt atyre turke.
Presidenti Bujar Nishani i shkruan homologut të tij turk se ndihet i tronditur dhe i revoltuar nga sulmet terroriste në aeroportin ndërkombëtar të Stambollit.
“I dënoj me forcën më të madhe këto akte të urryera terroriste që përgjakën muajin e shenjtë të Ramazanit dhe synojnë të trembin e destabilizojnë Turqinë mike, si dhe ju siguroj se në këto momente të vështira e kritike, unë dhe populli shqiptar jemi pranë jush, pranë familjarëve të viktimave dhe popullit mik turk”, – theksohet në mesazhin e Kreut të Shtetit shqiptar drejtuar Presidentit të Turqisë, Erdoğan.
Edhe Ministria e Punëve të Jashtme e Republikës së Shqipërisë ka shprehur ngushëllimet më të ndjera për familjarët e viktimave dhe qeverinë turke, si dhe solidaritet me Turqinë mike dhe vendosmëri për të qenë së bashku në luftën kundër terrorizmit dhe ekstremizimit të dhunshëm.
Gjithashtu kryetari i Kuvendit, Ilir Meta i dërgoi mesazh ngushëllimi Kryetarit të Parlamentit të Turqisë, Ismail Kahraman.
“Sulmi në Stamboll është goditje ndaj gjithë njerëzimit dhe ndaj vlerave që na bashkojnë. Shqipëria dhe populli shqiptar qëndrojnë përkrah jush gjatë këtij momenti të errët e të dhimbshëm. Jemi të palëkundur në angazhimin tonë kundër terrorizmit. Në solidaritet të plotë me popullin mik turk dënojmë me force çdo akt terrorizmi, që cenon qytetarët e pafajshëm”, – u shpreh Ilir Meta në mesazhin dërguar homologut turk, Kahraman. /tesheshi.com/
