Nga Bashkim Kastrati
Blerja e 51 autobusëve të rinj në Komunën e Prishtinës ka dal të jetë “mollë sherri” në mes të këtij institucioni dhe nivelit qendror të Kosovës. Komuna e Prishtinës, që drejtohet nga Shpend Ahmeti i Vetëvendosjes, kohë më parë ka hapur tenderin për blerjen e 51 autobusëve të rinj me anë të së cilëve do ta zbuste kaosin në trafikun e kryeqytetit. Kjo është një kredi e butë në vlerë prej 10 milionë eurove.
Por marrja e kësaj kredie nuk mund të bëhet pa u dhënë drita e gjelbër në Kuvendin e Kosovës nga ana e deputetëve dhe nënshkrimit të kontratës nga Ministria e Financave që drejtohet nga Avdullah Hoti i Lidhjes Demokratike të Kosovës.
Komuna e Prishtinës e akuzon Ministrinë e Financave që tash e tetë muaj nuk po ia nënshkruan garancinë për blerjen e këtyre autobusëve në mënyrë që të finalizohen procedurat. Ndërkaq, krerët e Komunës së Prishtinës kanë deklaruar se ky bllokim po bëhet për shkaqe politike, në mënyrë që Komuna e Prishtinës të mos ketë sukses me këtë projekt, pasi që 51 autobusët do të ishin të dukshëm si punë e mirë e menaxhmentit aktual.
Komuna e Prishtinës me anë të një komunikate për media ka sqaruar opinionin publik rreth negociatave me Bankën Evropiane për Rindërtim dhe Zhvillim-in për projektin e autobusëve të rinj që do të operonin në Prishtinë.
Gjithashtu, komunikata sqaron edhe kontaktet e Komunës së Prishtinës dhe Ministrisë së Financave dhe theksohet se të gjitha negociatat kanë përfunduar gjatë muajit gusht.
“Në ato negociata dyditore, Ministria e Financave, Komuna e Prishtinës dhe Banka Evropiane për Rindërtim dhe Zhvillim, janë dakorduar dhe kanë nënshkruar kushtet e kredisë. Duke u bazuar në dakordimin me Ministrinë e Financave, BERZH-i ka dërguar kredinë në aprovim në bord më 3 shtator 2015. Po mos të kishte dakordimin e Ministrisë së Financave nuk do ta dërgonin, sepse ky ishte parakusht. Që nga gushti i vitit 2015, Ministria nuk ka dërguar as edhe një letër, dhe po ashtu nuk ka kërkuar asnjë sqarim nga Komuna. Kemi dëshmi të emaileve të panumërta nga BERZH-i, duke pyetur se çka po ndodhë. Kur para dy jave në vizitë erdhi një delegacion i lartë i BERZH-it, sa për tu arsyetuar Ministria e Financave ka ftuar Kryetarin e Komunës në takim, ku për çudi ka kërkuar autorizimin, për të cilin ata e kanë ditur se ka ekzistuar qysh në fillim”, thuhet në sqarimin e komunës.
Aktualisht në Prishtinë operojnë disa autobusë shumë të vjetër që nuk i plotësojnë aspak kushtet për të kryer këtë shërbim për qytetarët.
Duke marr parasysh situatën e lartcekur ka filluar një fushatë e cila ka për qëllim ta shtyjë këtë çështje përpara. Ata kanë nisur edhe një peticion i cili do të dërgohet në adresë të Ministrisë së Financave.
Formulari do të jetë online dhe do të iu mundësoj qytetarëve që në këtë formë ta plotësojnë peticionin.
“Qytetarët e Prishtinës, kanë formuar një peticion në formën online, që t’ i dërgojnë Ministrisë së Financave, kërkesën për blerjen e autobusëve . Formularët e peticionit janë gati. Derisa të bëhemi gati që të dalim me shtande nëpër qytet, bëjmë apel te qytetarët që ta shkarkojnë PDF-në e formularit online. Në këtë mënyrë peticionin mund ta shtypni e plotësoni vetë, dhe më pas i grumbullojmë të gjitha nëpër pika të caktuara të grumbullimit”, thuhet në shkresën e tyre.
Iniciativa ka gjetur përkrahjen e shumë qytetarëve
Krenar Shala, aktivist i shoqërisë civile është iniciator i kësaj fushate e cila ka për qëllim që të bëjë presion mbi Ministrinë e Financave për të zhbllokuar blerjen e autobusëve.
“Arsyeja e ndërmarrjes së kësaj nisme është rritja e presionit publik ndaj institucioneve përkatëse, në këtë rast Ministrisë se Financave dhe Komunës se Prishtinës për të zhbllokuar dhënien e kredisë nga ana e BERZh-it për blerjen e 51 autobusëve”, thotë Shala.
Ai thotë se që nga pas-lufta, qytetarët e Kosovës përballen në komunikacion të dendur dhe shumë stresues, i cili është duke ua rënduar jetën tej mase. Për këtë shkak, kjo nismë gjeti përkrahje të gjithë qytetare dhe pa dallime partiake.
“Konsiderojmë që kjo nisme duhet të përkrahet nga çdo qytetar i Kosovës pasi që realizimi i synimit të saj do të ndikojë drejtpërdrejt në lehtësimin e jetës se banoreve të Prishtinës dhe gjithë Kosovës”, theksoi Shala. /tesheshi.com/
