Shqipëria do të kryesojë Këshillin e Sigurimit të Kombeve të Bashkuara nga 1 qershori deri në fund të muajit, më pak se një vit pasi u zgjodh anëtare jo e përhershme e organit më të lartë të OKB-së.
Shqipëria u bë anëtare e OKB-së më 14 dhjetor 1955 dhe pas 66 vitesh anëtarësim, më 11 qershor të vitit të kaluar, u votua për herë të parë si një nga 15 anëtarët jo të përhershëm të Këshillit të Sigurimit. Mandati i saj filloi më 1 janar të këtij viti dhe skadon më 31 dhjetor 2023.
Ministrja e Jashtme shqiptare Olta Xhaçka tha se gjatë presidencës së saj në Këshillin e Sigurimit, vendi i saj do të bënte përpjekje të rëndësishme diplomatike për të izoluar Rusinë, e cila nisi një luftë në Ukrainë në shkurt të këtij viti.
Në fillim të vitit, Shqipëria njoftoi se do të përdorte pozicionin e saj në Këshillin e Sigurimit të OKB-së, ndër të tjera, për të përmirësuar “pozitën e Kosovës”, “si dhe procesin e njohjes dhe anëtarësimit në organizatat ndërkombëtare”.
Anëtarët e përhershëm të Këshillit të Sigurimit të OKB-së janë Shtetet e Bashkuara, Britania, Franca, Rusia dhe Kina, ndërsa 10 shtetet e tjera anëtare kanë një mandat dyvjeçar. /tesheshi.com/
