Shqipëria morri zyrtarisht kryesimin e OSBE-së. Si drejtues i saj, kryeministri Rama evokoi ato kohë kur kjo organizatë urrehej nga regjimi komunist në Shqipëri.
“Më lini t’u sjell në këtë moment të jashtëzakonshëm për vendin tim, atë që 45 vite më parë kur u themelua OSBE-ja, Shqipëria ishte një Kore e Veriut e Europës, e nxitur nga urrejtja ndaj botës së lirë. Ishte i vetmi shtet europian që refuzoi që të bëhej pjesë e OSBE-së dhe të denonconte krijimin e saj. Unë kam qenë pioner me shall të kuq, ndërsa tani u drejtohem si kryetar i kësaj organizate të 57 vendeve dhe 1 miliard banorësh”, tha Rama.
Më tej, me sinqeritet politik, shefi i qeverisë shqiptare tha se dhe ai dikur nuk e ka patur fort qejf OSBE-në.
Më lini të rrëfej se nuk më pëlqente shumë OSBE-ja ndërsa me partinë time në qeveri më dukej shumë e ashpër (koha e Nanos), ndërsa kur isha në krye të opozitës shumë e butë. Pa OSBE-në gjithcka që ne dëgjojmë do të ishin më shumë probleme për t’u zgjidhur. Ndjej mundësinë e madhe për të tërhequr diçka mbrapsht për organizatën tonë, pasi OSBE-ja i ka dhënë kaq shumë Shqipërisë në kaq shumë vjet”, theksoi Rama, dukebërë me dije se Ukraina do jetë destinacioni i parë i tij.
“Kriza në Ukrainë mbetet sfida më e madhe e sigurisë në Europë. Ka pasur sinjale inkurajuese, i përgëzojmë. Rruga për paqen e qëndrueshme mbetet e gjatë. Do të mbështesim përpjekjet e grupit tre palësh. Ukraina do të jetë destinacioni im i parë si kryesues i OSBE-së. Përpjekjet për zgjidhjen e konflikteve do të jenë në krye të axhendës sonë”, tha Rama. /tesheshi.com/
