Nga një zyrtar i lartë i OSBE-së ka ardhur mesazhi se kriza politike shqiptare mund të zgjidhet së shpejti.
“Ne pa diskutim që ndjekim nga afër zhvillimet politike në Shqipëri. Shpresojmë që ngërçi do të zgjidhet së shpejti. Besoj se zgjidhja do të gjendet brenda për brenda por ne inkurajojmë dialogun.
Është e nevojshme që të gjithë aktorët të angazhohen për funksionimin e demokracisë në vend. Pjesëmarrja në institucionet demokratike është e vetmja rrugë zhvillimi. OSBE është e gatshme për të ofruar mbështetje por asnjë zgjidhje nuk mund të jetë e qëndrueshme nëse nuk përfshihen të gjithë aktorët”, tha Sekretari i Përgjithshëm i OSBE-së, Thomas Greminger, gjatë një konference të përbashkët me ministrin e Jashtëm në detyrë Gent Cakaj, në aktin e marrjes së kryesimit të kësaj organizate nga Shqipëria.
“Kryesia e OSBE-së nuk është një përpjekje e vogël. nuk është vetëm një sipërmarrje diplomatike, por duhet të mbështetet nga i gjithë shteti shqiptar. Nuk ka dyshime që Shqipëria mund t’ia kalojë me sukses. Do jetë edhe një ushtrim frymëzues dhe besoj se do përmirësojë profilin e Shqipërisë në arenën ndërkombëtare”, shtoi ai.
Nga ana e tij, ministri Cakaj tha se mazhoranca është e hapur për dialog.
“Mbesim të hapur për dialog dhe jemi të gatshëm të nisim menjëherë punën me të gjitha partitë politike si me ato që janë në parlament dhe ato që kanë dalë në rrugë”, tha Cakaj. /tesheshi.com/
