Shqipëria ka regjistruar numrin më të ulët të infektimeve në 24 që kur ia behu kriza epidemike me shfaqjen e rasteve të para, këto në fillim të marsit, më saktë në datën 8, me 2 infeksionet e para.
Vetëm 4 raste të reja janë shënuar, duke e bërë dhe me evidente rënien e kurbës së infeksionit, gjë që po çon dhe në shfuqizimin e masave izoluese.
Pos kësaj, janë harruar dhe vdekjet, duke kaluar 10-ditëshin pa asnjë sosh.
Nga Instituti i Shëndetit Publik, Dr. Eugena Tomini informoi:
“Bazuar në të dhënat e deritanishme vlerësohet se numri efektiv i riprodhimit nga data 24 prill e në vazhdim ka zbritur nën kufirin kritik (për R < 1). Sot është numri më i ulët i rasteve ditore pozitive, e përllogaritur në 8 javët e fundit. Në 24 orët të fundit janë testuar 121 qytetarë të dyshuar si të prekur me Covid-19 dhe kanë rezultuar pozitivë 4 qytetarë, përkatësisht 2 qytetarë në Tiranë, 1 në Kamëz dhe 1 në Shkodër.
Të shëruar janë 4 qytetarë. Deri më sot janë konfirmuar pozitivë me COVID-19 në të gjithë vendin 872 qytetarë. 654 qytetarë janë shëruar, ose 75% e të gjithë të prekurve.
Në të gjithë vendin aktualisht janë 187 persona aktivë me COVID19, kryesisht ne Tiranë, Krujë, Shkodër, Kamëz. Situata në spitale paraqitet e qëndrueshme prej ditësh. Aktualisht në dy spitalet COVID janë të shtruar 28 pacientë dhe vetëm 3 prej tyre janë në terapi intensive. Prej më shumë se 10 ditësh nuk kemi asnjë humbje jete”. /tesheshi.com/
