Shqipëria ka marrë një pikë në përballjen e luajtur në Strumicë me Maqedoninë, ndonëse kuqezinjtë kaluan të parët në avantazh me Odise Roshin.
Në grupin G, kombëtarja shqiptare pothuajse ka siguruar vendin e 3-të me 13 pikë, 4 më shumë se Izraeli i vendit të 4-të, që humbi përballë Italisë me rezultatin 1-0.
Në minutën e 23-të një goditje e fortë e Pandev nga jashtë zonës, u grushtua me vështirësi nga Berisha.
Në minutën e 53-të, një kundërsulm i shpejtë i kuqezinjve, Sadiku në krahun e majtë, sheh Roshin dhe lëshon një harkim perfekt për mesfushorin, i cili gjen rrjetën me gjuajtjen e parë në portën e Maqedonisë.
Në minutën e 69-të, drithërima për Shqipërinë. Alioski harkon nga e djathta, Nestorovski devijon topin dhe pastaj Pandev gjuan me kokë duke kaluar Berishën. Hysaj tregohet vendimtar, duke larguar topin nga vija e portës.
Në minutën e 77-të, arbitri Erikson akordon një penallti të dyshimtë për Maqedoninë. Pas një harkimi në zonë, Hysaj largon, por topi preket me dorë nga Roshi dhe 11 metërsh.
Trajkovski ka qenë i pagabueshëm nga penalltia, dhe 1:1.
Në minutën e 85-të, portieri Etrit Berisha shpëton portën nga dy goditje radhazi. E para është një gjuajtje fluturimthi nga jashtë e Alioskit, të cilin ai e grushton, ashtu si edhe gjuajtjen e Nestoroskit nga një distancë e afërt.
Shqipëria fitoi një pikë shumë të rëndësishme në transfertë, ndërsa tekniku Christian Panuçi në dy sfidat në stolin e kuqezinjve ka arritur të marrë 4 pikë.
Përgjatë ndeshjes, tifozët e Prilepit, të njohur me emrin “majmunët”, bënë thirrjet anti-shqiptare. Gjatë gjithë pjesës së parë ata kanë lëshuar vazhdimisht kore “shqiptar i mirë, është shqiptari i vdekur”, si dhe “dhoma gazi për shqiptarët”.
Kundrejt thirrjeve të tilla nuk ka ndërhyrë as policia dhe as arbitri nuk ka ndërprerë takimin. /tesheshi.com/
