Shqipëria, me Kryepolic të ri “pa thelb” në CV

Ilir Proda do të jetë Drejtori i Përgjithshëm i Policisë së Shtetit.

Ministri i Brendshëm Ervin Hoxha bëri të ditur se kandidatura e dërguar prej tij në qeveri, ajo e Ilir Prodës, përzgjedhur përmes një procesi transparent konkurrimi, është miratuar në Këshillin e Ministrave.

Në një deklaratë, pas mbledhjes së qeverisë, Hoxha tha se në konkurrim ishin 10 drejtues të lartë.

“Proda ka kaluar të gjitha verifikimet e pastërtisë së figurës”, deklaroi Hoxha.

Më tej, ministri informoi se menjëherë do të hapet konkursi edhe për të gjithë drejtuesit e Policisë në Qarqe.

Me një karrierë gati 19 vite në Policinë e Shtetit, Ilir Proda mbante prej marsit të vitit të kaluar postin e Drejtorit të Policisë Elbasan.

Proda e ka nisur rrugëtimin e tij në uniformat blu në vitin 2005, fillimisht si specialist i policisë kriminale në Komisariatin nr. 3.

Më pas, për shumë vite ka shërbyer si specialist në Komisariate dhe në Drejtorinë e Përgjithshme.

Në 2013 ai emërohet Shef Komisariati, detyrë të cilën e mbajti gati një vit dhe dy vite të tjera, deri në vitin 2016 shërbeu si Shef i Komisariatit të Bulqizës.

Në korrik të vitit 2019, pasi merr gradën Kryekomisar, ai emërohet Zv/Drejtor për hetimin e krimeve në Korçë.

Ndërsa në 2021 emërohet në po të njëjtën detyrë në Policinë e Elbasanit.

Në mars të vitit 2023, pasi mori gradën drejtues, ai u emërua drejtor i Policisë Elbasan.

Proda ka diplomë avokati dhe master shkencor për të drejtë penale. Po ashtu ka marrë pjesë në kurse e seminare të ndryshme ku është pajisur me certifikatë.

E megjithatë, pos këtyre të dhënave, nuk jepet asnjë e dhënë tjetër për arritje profesionale të këtij emri në raport me krimin, pra aty ku ka drejtuar uniformat blu.

Kështu, Shqipëria ka një Drejtor të ri Policie që i ofrohet CV-ja pa arritje konkrete.

Ky duhej të ishte dhe thelbi i CV-së së tij. /tesheshi.com/