Shqipëria do t’i bëhet krah Italisë duke pritur nga fqinji i saj tej detit qindra emigrantë apo refugjatë të paligjshëm që synojnë brigjet e saj, ardhur sidomos nga Afrika veriore. Kryeministri shqiptar Edi Rama udhëtoi drejt Romës për të firmosur me homologen italiane marrëveshjen e cila do të kthejë Shqipërinë një një vend pritës për të paktën 36 mijë sosh në vit. Ishte Meloni e cila bëri publike disa detajet të këtij pakti, bisedimet për të cilin kanë nisur pak muaj më parë.
“Emigracioni i paligjshëm është një fenomen që vendet e BE nuk mund ta përballojnë të vetëm. Për këtë arsye Shqipëria do t’i japë mundësinë Italisë për të përdorur disa zona të vendit të Shqipërisë ku Italia mund të operojë sipas juridiksionit dhe shpenzimeve të saj për dy struktura ku do të strehohen emigrantët. Fillimisht do të jenë 3000 refugjatë, derisa autoritetet italiane të shqyrtojnë kërkesat e tyre për azil. Ky fluks në harkun e një viti mund të shkojë deri në 36 mijë emigrantë. Kjo marrëveshje nuk përfshin të miturit, gratë shtatzënë dhe grupet e tjera vulnerabël. Juridiksioni i këtyre qendrave do të jetë i Italisë”, u shpreh Meloni.
Rama nga ana e tij e quajti këtë një borxh ndaj Italisë, referuar pritjes prej saj të mijëra emigrantëve shqiptarë në fillim të viteve ‘90-të.
“Kjo marrëveshje lind kur Giorgia mendonte se do të bënte pushimet, por lajmet për zbarkimet nuk e lanë të qetë të zbarkonte në plazh. Dhe për këtë arsye unë zbarkoja të ajo për të gjetur një zgjidhje se si ta ndihmoja”, tha Rama, duke shtuar: “…Të paguajmë atë borxhin që kemi drejt Italisë, popullit italian dhe institucioneve italiane për atë që kanë bërë për ne nga dita e parë që kemi arritur në brigjet në këtë anë të bregut të detit për të gjetur mbështetje dhe për të pasur një jetë më të mirë”.
Ky zhvillim vjen pas atij të pritjes nga Shqipëria të qindra afganëve, me kërkesë amerikane, të cilët ikën nga regjimi taleban. /tesheshi.com/
