Në Beograd ka festë për një shqiptar, ka festë për atletikën shqiptare. Izmir Smajlaj është shpallur kampion i Europës në kërcim së gjati, duke fituar medaljen e artë, siç nuk ka bërë deri tani asnjë atlet tjetër shqiptar.
Në Kampionatin Europian të Atletikës në Salla të Mbyllura, Smajlaj ka përsëritur suksesin e Ballkaniadës, të zhvilluar ditë më parë po në Beograd.
Një sukses i jashtëzakonshëm për tërë atletikën shqiptare, më i pari i tillë. Ndërkohë, Izmir Smajlaj ka thyer dhe rekordin kombëtar me hedhjen e tij 8.08 metra.
Suedezi Michel Torneus dukej më në pozita të mira për ta fituar garën, për t’u shpallur sërish kampion i Europës, pas kishte arritur të njëjtin rezultat që në hedhjen e parë. 23-vjeçari Smajlaj arriti të dilte i pari pas hedhjes së fundit, me një gabim më pak se suedezi. I treti u rendit ukrainasi Serhiy Nykyforov, i cili kërceu 8.07 metra.
“Ndjehem aq mirë tani, dhe ia kushtoj këtë medalje babait tim,” deklaroi pas garës atleti shqiptar.
“Ishte një natë për t’u kujtuar në Kampionatin Europian të Atletikës në Salla të Mbyllura Beograd 2017 ndërsa… Izmir Smajlaj fitoi të parën medalje të Shqipërisë në historinë e aktivitetit,” shkroi një faqe elektronike e specializuar për atletikën. /tesheshi.com/
