Shqipëria gdhihet me tragjedi emigrantësh

Shqipëria u gdhi me tragjedinë e vdekjes së tetë personave, shtatë nga ata emigrantë të huaj dhe një shqiptar, ky i fundit, shoferi që i transportonte.

Ngjarja e rëndë ka ndodhur në Këlcyrë, ku automjeti katër vendësh me tetë frymë brenda fluturoi në Vjosë si pasojë e shpejtësisë në një përpjekje për t’i ikur ndjekjes nga Policia.

Mjeti po udhëtonte nga pika doganore Tre Urat drejt Përmetit. Pikasja nga Policia ka bërë që të vijojë drejt Këlcyrës, duke rezultuar në një rrugë fatale.

Sipas të dhënave paraprake, shpejtësia e mjetit në ikje ka qenë e madhe, gati me 180 në orë, në çastin kur ka dalë nga rruga e fluturuar në luginën e rrjedhjes së Vjosës.

Drejtori i Policisë së Gjirokastrës, Ardian Çipa, dha këto detaje mbi ngjarjen e rëndë

“Policia ka hasur një mjet që po vinte me shpejtësi tej normave të lejuara. Në përpjekje e sipër për t’i bërë shenjë për të ndaluar, automjeti është kthyer dhe është nisur me drejtim nga qyteti i Përmetit. Patrulla e policisë me automjetin e vet e ka ndjekur deri ën afërsi të vendit të ngjarjes, ka informuar sallën operative për mjetin që ishte larguar në drejtim të Përmetit me shpejtësi. Rreth orës 03:55, duke qenë se nuk është konstatuar automjeti, patrulla ka lëvizur drejt Përmetit duke marrë edhe kontakte me qytetarët që i ka pyetur nëse kanë parë një mjet të tillë. Kanë nisur inspektimin e zonës dhe ka parë shenja të aksidentit rrugor dhe ka parë automjetin që ka rënë në anë të lumit Vjosa.

Paraprakisht dyshohet se drejtuesi i mjetit që jemi ende duke punuar për ta identifikuar. Personat e tjera dyshohet se duhet të jenë emigrantë të paligjshëm. Nuk japim dot një konkluzion sa i përket shpejtësisë së automjetit. Numri i kufomave është i madh dhe si rezultat ka kryerjen e shumë ekzaminimeve për të marrë dhe administruar prova për identifikimin e personave dhe sqarimin e rrethanave”, tha Çipa.

Më tej, ishte drejtuesi i Prokurorisë së Gjirokastrës, Petrit Çano, që tha se pas identifikimit do të bashkëpunohet me ambasadat përkatëse për të dërguar trupat e pajetë pranë familjarëve.

“Ne jemi informuar nga drejtoria e policisë. Së bashku me prokurorin e gashëm kemi ardhur në vendngjarje. Kemi organizuar punën për kqyrjen me kujdes të kufomave dhe identifikimin e tyre. Më pas do të punojmë për të zbuluar shkaqet dhe përgjegjësitë nëse ka të tilla.

Me konstatimin e patrullës së policisë, mjeti është rikthyer në drejtim të qytetit të Përmetit me shumë shpejtësi. Nuk mund ta përcaktojmë sa ka qenë, sepse do dalë nga hetimet në vijim. Ka dalë jashtë kontrollit dhe ka përfunduar në këtë pjesë.

Vetëm drejtuesi i automjetit është nga qyteti i Shkodrës, autometi është dhënë me qira nga pikat e dhënies me qira. Pra nuk është pronari i mjetit. Të gjithë të tjerët janë persona nga vendet e treta. Nuk i kemi identifikuar dhe nuk i dimë cilat shtetas i përkasin. Jemi duke pritur ekspertët mjekoligjorë për ekzaminimin e tyre. Pas identifikimit do të bashkëpunojmë me ambasadat përkatëse për të dërguar trupat e tyre.

Nuk mund të themi se është thjesht një aksident. Kjo ka ardhur rrjedhojë e një ngjarje tjetër kriminale, atë të të transportit të personave që në mënyrë të paligjshme kalojnë kufirin shtetëror për të vijuar më pas në BE. Është kombinim i këtyre dy veprave penale të cilat do i shikojmë në thellësi për të zbardhur dhe shkakun”, tha ai nga vendngjarja. /tesheshi.com/