Bashkimi Evropian ka ndërmarrë hapa për të forcuar bashkëpunimin në fushën e migracionit me Bosnjen, Serbinë, Shqipërinë dhe Malin e Zi, të cilat kanë marrëveshje me Frontex.
Këshilli Evropian autorizoi Komisionin Evropian që të hapë negociatat për bashkëpunim me këto vende.
“Sfidat e migracionit në rrugën e Ballkanit Perëndimor nuk fillojnë në kufijtë e BE-së. Bashkëpunimi me partnerët tanë, duke përfshirë vendosjen e stafit të Frontex-it, është thelbësor për zbulimin e hershëm dhe bllokimin e lëvizjeve të migracionit të paligjshëm. Kjo do të përmirësojë mbrojtjen e kufijve të jashtëm të BE-së dhe do të kontribuojë në përpjekjet që Ballkani Perëndimor po investon në parandalimin e kontrabandistëve që të përdorin zonat e tyre shtetërore për tranzit”, thuhet në një deklaratë të Këshillit Evropian.
Detajet e bashkëpunimit mes BE-së dhe katër vendeve ballkanike nuk janë specifikuar.
Marrëveshjet e negociuara nën mandatin e ri të Frontex do të lejojnë agjencinë të ndihmojë ato vende në përpjekjet e tyre për të menaxhuar flukset e migracionit, për të luftuar imigracionin e paligjshëm dhe për të luftuar krimin ndërkufitar në të gjithë territorin e tyre kombëtar.
Marrëveshjet e reja do të lejojnë gjithashtu stafin e Frontex të ushtrojë kompetenca ekzekutive, të tilla si kontrollet kufitare dhe regjistrimi i personave. /tesheshi.com/
